काठमाडौं । पछिल्लो समयमा विभिन्न कम्पनीले चालु आर्थिक वर्षको तेस्रो त्रैमासको वित्तीय अवस्था सार्वजनिक गरिरहेका छन् ।
उक्त वित्तीय अवस्था अनुसार जलविद्युत कम्पनीहरुको नाफा मिश्रीत खालको देखिएको छ ।
खोलामा पानीको बहाब घटेका कारण कम्पनीहरुको नाफामा भने उल्लेख्य प्रगति देखिन सकिएको छैन । विद्युत बिक्रीबाट हुने आम्दानीमा पनि ह्रास नै देखिएको छ । कतिपय कम्पनीको नाफा तथा विद्युत बिक्रीबाट हुने आम्दानी पनि निकै बढेको छ ।
चालु आर्थिक वर्षको तेस्रो त्रैमाससम्म आईपुग्दा कालिका पावरले ६ करोड २१ लाख ५ हजार रुपैयाँ नाफा आर्जन गरेको छ । जुन गत आवको सोही अवधिको तुलनामा ३४.२७ प्रतिशतले बढी हो । गत आवको सोही अवधिमा ४ करोड ६२ लाख ५३ हजार रुपैयाँ नाफा आर्जन गरेको थियो ।
यस्तै चैत मसान्तसम्म आईपुग्दा कम्पनीको विद्युत् बिक्रीबाट हुने आम्दानीमा सुधार देखिएको छ । यो अवधिमा कम्पनीले विद्युत बेचेर गर्ने नाफा ४.६७ प्रतिशतले बढाएर १४ करोड ५६ लाख ३० हजार रुपैयाँ पुगेको छ । अघिल्लो वर्षको सोही अवधिमा १३ करोड ९१ लाख २५ हजार रुपैयाँ रहेको थियो ।
विद्युत बिक्रीबाट आम्दाबी बढेपनि अन्य स्रोतबाट हुने आम्दानी २ लाख ७६ हजार रुपैयाँबाट घटेर १ लाख ६८ हजार रुपैयाँ मात्रै रहेको छ । ६० करोड रुपैयाँ चुक्ता पुँजी रहेको कम्पनीको जगेडा कोषमा १२ करोड ४८ लाख ८५ हजार रुपैयाँ रहेको छ । प्रतिसेयर आम्दानी वार्षिक १३ रुपैयाँ ८० पैसा रहेको कम्पनीको प्रतिसेयर नेटवर्थ १२० रुपैयाँ ८१ पैसा रहेको छ ।
यस्तै युनाइटेड मोदी हाइड्रोपावरको पनि नाफा ३०.५९ प्रतिशतले बढेको छ । गत आवको तेस्रो त्रैमासमा ४ करोड ४ लाख २ हजार रुपैयाँ नाफा आर्जन गरेकोमा चालु आवको सोही अवधिमा आईपुग्दा ५ करोड २७ लाख ६५ हजार रुपैयाँ नाफा आर्जन गरेको छ ।
कम्पनीले यो अवधिमा २२ करोड ६३ लाख ५१ हजार रुपैयाँ सञ्चालन आम्दानी गरेको छ । गत आवमा २३ करोड ५२ लाख २१ हजार रुपैयाँ रहेको सञ्चालन आम्दानी रहेको थियो । यो अवधिमा सञ्चालन आम्दानी घटेको छ ।
१ अर्ब १५ करोड रुपैयाँ चुक्ता पुँजी रहेको बैंकको र जगेडा कोषमा ६ करोड ५७ लाख ८७ हजार रुपैयाँ रहेको छ । प्रतिसेयर आम्दानी ४ रुपैयाँ ५९ पैसा रहेको छ भने प्रतिसेयर नेटवर्थ १०५ रुपैयाँ ७२ पैसा रहेको छ ।
यता पञ्चकन्या माई हाइड्रोपावर चालु आर्थिक वर्षको नौ महिनासम्ममा २१ करोड १४ लाख रुपैयाँ नोक्सानमा रहेको छ । यो अवधिमा आइपुग्दा कम्पनीको नोक्सान झनै बढेको छ । गत आवको सोही अवधिमा कम्पनीको नोक्सान १६ करोड ३६ लाख रुपैयाँ भन्दा बढी रहेको थियो । विद्युत् बिक्रीबाट हुने आम्दानी गत आवको तुलनामा १७ करोड ६७ लाख रुपैयाँ रहेकोमा चालु आवको सोही अवधिमा आइपुग्दा १५ करोड ५० लाख रुपैयाँ मात्रै रहेको छ ।
१ अर्ब १० करोड रुपैयाँ चुक्ता पुँजी रहेको कम्पनीको जगेडा कोष २१ करोड १४ लाख रुपैयाँले ऋणात्मक रहेको छ । प्रतिसेयर १ रुपैयाँ ११ पैसा नोक्सानमा रहेको कम्पनीको प्रतिसेयर नेटवर्थ ८० रुपैयाँ ७८ पैसा रहेको छ ।
चालु आर्थिक वर्षको नौ महिनामा आईपुग्दा युनिभर्सल पावर कम्पनीको नाफा ५६.५७ प्रतिशतले घटेर १ करोड ८४ लाख रुपैयाँ रहेको छ । गत आवाको सोही अवधिमा ४ करोड २३ लाख रुपैयाँ नाफा आर्जन गरेको थियो । कम्पनीको अन्य स्रोतबाट हुने आम्दानी पनि घटेको छ । गत आजको तेस्रो त्रैमासमा ६ करोड २० लाख रुपैयाँ अन्य स्रोतबाट आम्दानी भएकोमा चालु आवको सोही अवधिमा २ करोड ८१ लाख रुपैयाँ मात्रै रहेको छ ।
२ अर्ब १० करोड रुपैयाँ चुक्ता पुँजी रहेको कम्पनीको जगेडा कोषमा ११ करोड ९२ लाख रुपैयाँ रहेको छ । १ रुपैयाँ १७ पैसा प्रतिसेयर आम्दानी रहेको कम्पीको प्रतिसेयर नेटवर्थ १०५ रुपैयाँ ६८ पैसा रहेको छ ।
वि.सं.२०७८ वैशाख ३१ शुक्रवार १५:२० मा प्रकाशित
