गजुरी,धादिङ । धादिङ जिल्लाको गजुरी गाउँपालिका वडा नम्बर २ मा पर्ने विहानी पम्प नजिकैको चाम्वास स्थित पृथ्वीराजमार्गबाट ट्रिपर त्रिशूली नदीमा खसेर बेपत्ता भएको छ । सिद्धलेक गाउँपालिकाको फिसफिसेटारबाट वालुवा लिनका लागि गजुरी तर्फ जादैँ गरेको बा ४ ख ५१४६ नम्बरको ट्रिपर सडक देखि २५ मिटर तल त्रिशूली नदीमा खसेर बेपत्ता भएको गजुरी प्रहरीले जनाएको छ ।
ट्रिपर चालक काले भनिने सागर परियार र उनले साथीका रुपमा लिएर आएका सिद्धलेक गाउँपालिका फिसफिसेटारका २१ वर्षका भोजराज थपलिया हराइरहेका छन् । सुतिरहेका थपलियालाई चालक परियारले जवरजस्ति उठाएर साथीका रुपमा लिएर गएको थपलियाका आफन्तहरुले वताएका छन् । थपलिया यस अघि ट्रयाक्टर चालकको काम गर्दथे ।
सडक छेउका ४ वटा प्याराफिट ढाल्दै २५ मिटर तल त्रिशूली नदीमा खसेको थियो । टिप्पर खसेको पुलबाट तर्दै गरेका बटुवाहरुले देखेपछि नजिकैको गजुरीस्थित प्रहरीलाई खबर गरेका थिए । हराइरहेकाहरुको खोजीमा स्थानीय,नेपाल प्रहरी, सशस्त्र प्रहरी लागेका छन् । बाढीका कारण त्रिशूलीमा पानीको बहाव बढेकोले खोजीमा समस्या भएको जिल्ला ट्राफिक प्रहरी कार्यालय, गजुरीले जनाएको छ ।
प्रकाशित मितिः २०७४ साउन १२
वि.सं.२०७४ साउन १२ बिहीवार १४:२५ मा प्रकाशित
