रबिना पौडेल,काठमाडौ । “नेपाली जुटौँ बाल विवाह रोकौँ ” अभियान शुभारम्भ भएको छ । वर्ल्ड भिजन इन्टरनेसनल नेपाल र सामुदायिक रेडियो प्रसारक संघ नेपालले संयुक्त रुपमा आयोजना गरेको अभियानको आज काठमाडौँमा राष्ट्रपति विद्यादेवी भण्डारीद्वारा शुभारम्भ गरिएको हो ।
युनिसेफको तथ्याङ्क अनुसार एसियामा बाल विवाह गर्नेमध्ये नेपाल तेस्रो मुलुक हो । त्यसैले यो समस्यालाई सम्बोधन गर्ने र नेपालमा बाल विवाह न्यूनीकरण गर्ने उद्देश्यले सो अभियानको शुभारम्भ गर्नु परेको आयोजकको भनाई छ ।
यो अभियानले दिगो विकासका लक्ष्यहरु खास गरी दिगो विकास लक्ष्य नं ५.३ र १६.२ले निर्दिष्ट गरेको लक्ष्य पूरा गर्न सरकारलाई सहयोग गर्नेछ । वल्र्ड भिजन इन्टरनेसनल नेपालकी राष्ट्रिय निर्देशक एलिजावेथ हान्ना साटोले भनिन्–“नेपालको कानुनले महिला पुरुष दुवैका लागि विवाहको उमेर २० वर्ष तोकेको भएतापनि नेपालमा अझै पनि विवाहको प्रचलन ग्रामीण र शहरी दुवैमा व्याप्त देखिन्छ । बाल विवाह मानव अधिकारको उल्लंघन हो त्यसैले यसको उन्मूलन गर्न अभिभावक, विद्यालय, समुदाय, सरकार, कर्पोरेट र समग्र समाज जिम्मेवारी वहन गर्नुपर्छ ।”
त्यस्तै सामुदायिक रेडियो प्रसारक संघ नेपालका अध्यक्ष सुवास खतिवडाका अनुसार हाम्रो संविधान, ऐन, कानून र नीति नियमको मर्म र भावना अनुकुलको सामाजिक एवं सांस्कृतिक व्यवहार स्थापित गर्ने दायित्व सामुदायिक रेडियो एवं सञ्चार माध्यम र सबै सचेत नागरिकको हो ।
नेपाल सरकारले बालविवाह जस्ता कुरीति, कुसंस्कारको सन् २०३० सम्म अन्त्य गर्ने योजना बनाएको छ । सबैले आफ्नो तर्फबाट यस योजना सफल बनाउन लागि पर्नु पर्ने बताइएको छ । कार्यक्रममा विभिन्न पदस्थ व्यक्तित्वहरु, नागरिक समाज रबालबालिकाहरुको उपस्थिति रहेको थियो ।
प्रकाशित मितिः २०७४ साउन २६
वि.सं.२०७४ साउन २६ बिहीवार १५:३३ मा प्रकाशित
