काठमाण्डौं । कृषि विकास बैंकले दशैं लगत्तै एक करोड ९६ लाख ८८ हजार कित्ता हकप्रद सेयर निस्कासन गर्ने भएकोछ । बैंकले ५० प्रतिशत हकप्रद सेयर जारी गर्ने भएको हो । जस अनुसार एक कित्ता सेयर आवेदनका लागि कृषि विकास बैंकको दुई कित्ता आफुसँग हुनु पर्नेछ ।
कृषि विकास बैंकले एक करोड ९६ लाख ८८ हजार कित्ता हकप्रद सेयर निस्कासन गरेको हो। यो सेयर बाँडफाँड पश्चात बैंकमा सर्वसाधारणको तर्फबाट चुक्ता पुँजी पाँच अर्ब ९० करोड ६४ लाख रुपैयाँ पुग्नेछ।
त्यस बाहेक बैंकमा सरकारको पाँच अर्ब ४३ करोड २७ लाख १२ हजार रुपैयाँ बराबरको अग्राधिकार सेयर समेत रहेको छ। यसरी हकप्रद पश्चात बैंकको कुल चुक्ता पुँजी ११ अर्ब ३३ करोड ९१ लाख १२ हजार रुपैयाँ पुग्नेछ । बैंकको अधिकृत पुँजी १८ अर्ब रुपैयाँ रहेको छ। त्यस मध्ये आधा साधारण सेयर र त्यहि मात्रामा अग्राधिकार सेयर रहनेछ ।
हकप्रद सेयर कात्तिक तीन गते निस्कासन गरि मंसिर सात गते बिक्री बन्द हुनेछ। कृषि विकास बैंकका सबै शाखा एवं निस्कासन तथा बिक्री प्रबन्धक एस क्यापिटल, एस डेभलपमेन्ट बैंकका शाखा र सिआइबिएल क्यापिटल मार्फत हकप्रद सेयर आवेदन गर्न सकिनेछ।
२१ असोज २०७३, ११।००
वि.सं.२०७३ असोज २१ शुक्रवार १३:२६ मा प्रकाशित
