काठमाडौँ, २९ भदौ । कृषि विकासमन्त्री गौरीशङ्कर चौधरीले कृषि पेसामा मुलुकलाई आत्मनिर्भर बनाउनका लागि पहल गरिने बताएका छन् ।
इजरायल रिटननेट समाजले यहाँ आज आयोजना गरेको बृहत् भेटघाट तथा पुनर्मिलन कार्यक्रममा मन्त्री चौधरीले विदेशमा सीप सिके पनि त्यसको सदुपयोग स्वदेशमा आएर गर्नैपर्ने भन्दै कृषिमा मुलुकलाई आत्मनिर्भर बनाउनका लागि पहल गरिने बताएक हुन ।
त्यसैगरी कृषिविकास राज्यमन्त्री राधिका तामाङले व्यावसायिक कृषकलाई प्रोत्साहन गर्न सरकारले पूर्ण सहयोग गर्ने बताए ।
नेकपा (एमाले)का सचिव तथा प्रचार विभाग प्रमुख योगेश भट्टराईले युवावर्गले विदेशमा सीप सिकेर उक्त सीप नेपालमा लगानी गरी अन्य युवालाई रोजगारी सिर्जना गर्न क्रियाशील रहन अनुरोध गरे ।
उक्त समाजका अध्यक्ष खोजराज कटुवालले देशलाई समृद्ध पार्नका लागि सरकारले कृषि क्षेत्रको लगानी बढाउनुपर्नेमा जोड दिए ।
नेपाल व्यावसायिक कृषक सङ्घको सचिव रवीन्द्र विष्टले विदेशमा कमाएको पैसा स्वदेशमा ल्याई उत्पादनशील व्यवसायमा लगानी गर्नुपर्ने बताए । हाल काठमाडौँ उपत्यकामा मात्र विभिन्न क्षेत्रका गरी ५०० व्यावसायिक कृषक रहेका छन् ।
वि.सं.२०७३ भदौ ३० बिहीवार ०८:२६ मा प्रकाशित