काठमाण्डौं । अन्नपुर्ण केबलकार प्रालिले पर्यटकीय स्थल साराङकोटलाई लक्षित गर्दै ८० करोडको लागतमा निमार्ण गर्न लागेको केबलकारमा स्थानीयबासीको १० प्रतिशत सेयर लगानी हुने भएकोछ । पोखरा–सराङकोट क्षेत्रमा बन्न लागेको उक्त केबलकारको हिजो बुधबार शिलान्यास गरिएकोछ । केबलकार डेढवर्षभित्र सम्पन्न हुने लक्ष्य लिइएकोछ ।
अन्नपुर्ण केबलकार प्रालिले निमार्ण गर्न लागेको उक्त केलबरकारमा सर्वसाधारणको १० प्रतिशत सेयर लगानी बाहेक नेपाली व्यवसायी समूहको ७५, जापानी समूहको १५ प्रतिशत लगानी रहनेछ ।
पोखरा २६ सेदीबगर देखि पोखरा २६ सराङकोट भुमरेगैरासम्म २ दशमलव २ किलोमिटर लम्बाइ रहने केबलकारका १३ वटा टावर रहने छन् भने पहिलो चरणमा ८ जना यात्रु बस्न सक्ने १७ वटा डब्बा संचालनमा आउने बताइएकोछ ।
७ देखि ९ मिनेटसम्मको केबलकारको यात्रामा हिमाल, ताल र पोखराको उत्कृष्ट दृश्यावलोकन हुने भएकाले पर्यटकका लागि नयाँ गन्तब्य बन्ने कम्पनीका अध्यक्ष कालु गुरुले बताएका छन् । केबलकारको यात्रामार्फत एकैपटक फेवाताल, शान्ति स्तूपा, हिमश्रृंखला र पोखराबजारसँगै आसपासका स्थान अवलोकन गर्न सकिनेछ । यात्राकै बेलामा यात्रुले केबलकारको डिब्बाबाटै सूर्यौदय र सूर्यास्त सहज रुपमा देख्न सकिने अध्यक्ष गुरुङले बताए ।
३० मंसिर २०७३, ११।३०
वि.सं.२०७३ मंसिर ३० बिहीवार १७:२६ मा प्रकाशित
