बझाङ। बझाङका दर्जनौँ गाउँमा खाद्यान्न सङ्कट भएको छ । काँडालगायतका दर्जनौ गाउँमा खद्य संकट भएपछि सर्वसाधारणहरु जङ्गली कन्दमूल र सिस्नु खान थालेका छन् । ग्रामीण भेगमा खाद्यान्न ढुवानी हुन सकेको छैन । व्यापारीले भने खाद्यान्न ढुवानी नगरी रक्सी ढुवानी गर्न थालेका छन् ।
ग्रामीण भेगमा खाद्यान्न ढुवानी गर्दा व्यापारीलाई कम फाइदा हुने भएपछि उनीहरु खाद्यान्नको साटो बढी फाइदा लिन रक्सी (मदिरा) ढुवानी गर्न थालेका हुन् । बर्सेनि खाद्यान्नको सङ्कट झेल्दै आएका उत्तरी भेगका न्युना, बलौडी, लट्टोन, कोल, रजाडा, सैनगाउँ, बिछाडा, धलौन, एैराडी, पराली, डाउगाउँलगायतका बासिन्दा खाद्यान्न अभाव हुँदा जङ्गली कन्दमूल, सिस्नु खान थालेका छन् ।
व्यापारीले पसलमा खाद्य सामग्री नराखी मदिरामात्र राख्ने गरेका छन् भने दशैंको मुखमा कसैको घरमा अन्नपात छैन । सदरमुकाम चैनपुर पुग्न चार दिन लाग्छ । एक किलो मोटो चामलको मूल्य रु १६० पर्छ । कसरी जीवन धान्ने हो भन्दै स्थानीयहरु चिन्तीत बन्न थालेका छन् । चामल ढुवानी गर्न सम्बन्धित निकायले पहल नगरेको स्थानीय बासिन्दाले गुनासो गरेका छन् ।
प्रकाशित मितिः २०७३ असोज २०
वि.सं.२०७३ असोज २० बिहीवार २०:०८ मा प्रकाशित