बाँके । साउनको दोस्रो हप्तासम्म बाँकेमा करिब २० प्रतिशत मात्रै धान रोपाइँ भएको छ । जिल्ला कृषि विकास कार्यालय बाँकेका अनुसार सिँचाई सुविधा भएका केही स्थानमा मात्रै धान रोपाइँ भएको छ ।
आकाशे पानीको भरमा रोपाइँ हुने जिल्लाका धेरै ठाउँमा अहिलेसम्म रोपाइँ भएको छैन । कतिपय ठाउँमा जेठमा राखिएको धानको बिउ समेत सुक्न थालेको किसानले बताएका छन् । बाँकेमा ३६ हजार ५०० हेक्टर खेतियोग्य जमिनमा धान खेती हुने गरेको छ ।
जिल्ला कृषि विकास कार्यालय बाँकेका कृषि प्रसार अधिकृत धनबहादुर पुनका अनुसार, फत्तेपुर, बिनौना, महादेवपुरी, गंगापुर, राधापुर, चिसापानी, नौवस्तामा सिँचाई सुविधा भएका कारण धान खेती भएको छ । बाँकेमा गएको वर्ष साउन दोस्रो हप्तासम्म ५० प्रतिशत भन्दा बढी रोपाइँ सम्पन्न भइसकेको थियो ।
प्रकाशित मितिः २०७४ साउन १२
वि.सं.२०७४ साउन १२ बिहीवार १७:२० मा प्रकाशित