काठमाण्डौं । स्ट्यान्डर्ड चाटर्ड बैंक नेपालले २५ लाख ५८ हजार १४० कित्ता सेयर जारी गर्नका लागि अनुमति मागेकोछ । डेढ महिनाभित्र एफपिओ जारी गर्ने लक्ष्यका साथ धितोपत्र बोर्ड पुगेको बैंकले प्रति कित्ता १२ सय ९० रुपैयाँका दरले सेयर निस्कासन गर्न अनुमति माग गरेको छ।
बैंकको सञ्चालक समिति वैठकले १०० रुपैयाँ अंकित दरको सेयरमा ११ सय ९० रुपैयाँ प्रिमियम थप गरी अतिरिक्त सेयर अर्थात् एफपिओ जारी गर्न अनुमति माग गरेको हो । बैंकले प्रस्ताव गरेको मूल्यमा धितोपत्र वोर्डले आवश्यक अध्ययन गरि मूल्य थपघट गर्न सक्छ।
एफपिओबाट बैंकको पूँजीमा साढे २५ करोड रुपैयाँ थपिने छ। प्रिमियम वापत उठ्ने बाँकी तीन अर्ब चार करोड रुपैयाँ जगेडा कोषमा जाने छ। बैंकको अहिले दुई अर्ब ८१ करोड रुपैयाँ पूँजी छ।
२९ पुस २०७३, ११।००
वि.सं.२०७३ पुस २९ शुक्रवार १२:११ मा प्रकाशित
