काठमाण्डौं । १४ बाणिज्य बैंकहरुले २० अर्ब ३७ करोड रुपैयाँको हकप्रद शेयर आगामी दिनमा जारी गर्ने भएका छन् । सेयर नियमन नियकाबाट अनुमति लिइसकेको र अनुमति लिन बाँकी रहेकाले यति धेरै रकमको सेयर एकै पटक बजारमा भने आउनेछैन ।
हाल कायम २९ बाणिज्य बैंकहरु मध्ये १४ वटाले हकप्रद शेयर जारी गरेर राष्ट्र बैंकले तोकेको चुक्ता पूँजी कायम गर्ने निर्णय गरिसकेका छन् । यसले गर्दा सेयर बजारमा यति धेरै मात्रामा सेयर एकै पटक आउन लागेको हो ।
सबैभन्दा धेरै अनुपातमा लक्ष्मी बैंकले हकप्रद शेयर जारी गर्ने निर्णय गरेको छ भने सबैभन्दा कममा हिमालयन बैंकको अनुपात छ । नेपाल एसबीआई बैंकले प्रिमियममा २ अर्ब ६० करोड रुपैयाँ बराबरको हकप्रद जारी गर्ने निर्णय गरेकोछ ।
सानिमा, सिटीजन्स, कृषि बिकास र माछापुच्छ्रे बैंकले चुक्ता पूँजीको आधा हकप्रद जारी गर्ने निर्णय गरेकोछ । एभरेष्ट र स्टान्डर्ड चार्टर्डले पनि कम्तिमा ५० प्रतिशत हकप्रद जारी गर्ने निर्णय गर्ने भएका छन् ।
यी ९ बैंक बाहेक अन्य ५ बैंकहरुको गरेर बजारमा २० अर्ब ३७ करोड रुपैयाँ बराबरको सेयर आउन लागेको हो । तर यो कहिलेसम्म आउनेछ भन्ने विषय भने अहिले अन्योल नै छ ।
१४ जेठ २०७३, १।००
वि.सं.२०७३ जेठ १४ शुक्रवार १४:१५ मा प्रकाशित
