काठमाण्डौं । बैंक अफ काठमाण्डु लुम्बिनी र नेपाल दुरसंचार कम्पनीले प्रस्ताव गरेको लाभांस सुरक्षित गर्ने आज अन्तिम दिन हो । बिओकेएलले २३ प्रतिशत बोनस तथा एनटीसीले ५१ प्रतिशत नगद लाभांस घोषणा गरेका छन् । टेलिकमले फागुन ३० गते तथा बीओकेएलले चैत्र ३ गतेका लागि साधारणसभा बोलाएका छन् ।
साधारणसभा प्रयोजनका दुवै कम्पनीको फागुन १५ गतेबाट सेयरधनी दर्ता पुस्तिका बन्द हुदैछ । यी दुई कम्पनीले प्रस्ताव गरेको लाभांस लिन ईच्छुक लगानीकर्ताले विहीबारसम्म (आज) सेयर खरिद गरीसक्नुपर्नेछ । बैंक अफ काठमाण्डु र लुम्बिनी बैंक गाभिएर बनेको बैंक अफ काठमाण्डु लुम्बिनीले आगामी चैत्र ३ गतेका लागि बार्षिक साधारणसभा बोलाएको छ । बैंकले साधारणसभाबाट २३ प्रतिशत बोनस पारित गर्नेछ ।
त्यस्तै नेपाल दूरसञ्चार कम्पनी लिमिटेडको लाभांस सुरक्षित गर्नका लागि पनि आजै कम्पनीको सेयर खरिद गरिसक्नुपर्नेछ । कम्पनीले गतबर्षको कमाईबाट चुक्ता पुँजीको ५१ प्रतिशत नगद लाभांस बाड्ने भएको छ । कम्पनीले यहि फागुन ३० गते नवौ बार्षिक साधारणसभा राखेको छ ।
१२ फागुन २०७३, ११।००
वि.सं.२०७३ फागुन १२ बिहीवार १२:५७ मा प्रकाशित
