काठमाडौ । लक्ष्मी बैंक लिमिटेडले गत आर्थिक वर्षको कमाईबाट आफ्ना सेयरधनीलाई ३८ प्रतिशत बोनस सेयर दिने भएको छ । मंगलबार अर्थात् असार १३ गते सम्पन्न लक्ष्मी बैंकको सोह्रौँ वार्षिक साधारणसभाले आ.व. २०७२/०७३ सम्मको संचित मुनाफाबाट २०७३ आसार मसान्तमा कायम सेयर पूँजीको ३८ प्रतिशत बोनस सेयर वितरण गर्ने प्रस्ताव पारित गरेको हो ।
सो बोनस सेयर २०७३ असार मसान्त पश्चात प्रोफेशनल दियालो विकास बैंकलाई प्राप्ति गरेवापत सो विकास बैंकका सेयरधनीहरुलाई जारी गरिएको सेयर तथा १०० प्रतिशत हकप्रद सेयर पश्चात हाल कायम पूँजीको १८.२९ प्रतिशत हुन आउँछ । प्रोफेशनल दियालो विकास बैंकबाट कायम भई आएका सेयरधनीहरु, १०० प्रतिशत हकप्रद सेयरको बाँडफाँडबाट कायम सेयरधनीहरु तथा अवितरित हकप्रद सेयरको लिलामीबाट कायम सेयरधनीहरु समेत उक्त बोनस सेयर पाउन योग्य हुने बैंकले जनाएको छ ।
साधारणसभाले सर्बसाधारण सेयरधनीको तर्फबाट संचालक सदस्यमा विश्वकरण जैन र स्वाती रुंगटालाई पुनःनिर्वाचित गरेको छ । साथै साधारणसभाद्धारा बैंकको संस्थापक साधारण सेयरधनीको अनुपात परिवर्तन गरी संस्थापक सेयर ५१ प्रतिशत र साधारण सेयरको अनुपात ४९ प्रतिशत बनाउने विशेष प्रस्ताव पनि पारित गरेको छ ।
प्रकाशित मितिः २०७४ असार १४
वि.सं.२०७४ असार १४ बुधवार १७:३८ मा प्रकाशित