काठमाडौ । एभरेष्ट बैंकले करिब २ अर्ब २ करोड रुपैया बराबरको बोनस सेयर वितरण गर्ने भएको छ । बैङ्कले आफ्नो आगामी साधारण सभाबाट बोनस वितरण प्रस्ताव पारित गराउन लागेको हो । बैंकले गतबर्षको मुनाफाबाट प्रस्ताव गरेको ३३ प्रतिशत बोनस सेयर सुरक्षित गर्ने आज अन्तिम दिन रहेको छ । बैंकले प्रस्तावित लाभांस पारित गर्न पुस २८ गते २३ औं बार्षिक साधारण सभा राखेको छ । साधारणसभा प्रयोजनका लागि विहीबारदेखि बैंकको सेयरधनी दर्ता किताब बन्द हुँदैछ ।
बुधबारसम्म सेयरधनी कायम भएकाहरुले मात्र बैंकले प्रस्ताव गरेको लाभांस पाउनेछन् । बैंकले साधारण सभाका लागि पुस १३ गतेदेखि पुस २० गतेसम्म सेयरधनी किताब बन्द गर्ने भएको छ । यस अनुसार पुस १२ गतेसम्म सेयर किनेर सेयरधनी बनेका वा यसअघि नै सेयरधनी रहेका लगानीर्काले ३३ प्रतिशत बोनस र कर प्रयोजनका लागि १.७४ प्रतिशत नगद लाभांश प्राप्त गर्नेछन् ।
बैंकको साधारण सभाका अन्य एजेण्डाहरुमा सञ्चालक समितिमा प्रतिनिधित्व गर्ने ६ जना सञ्चालक (३ संस्थापक, २ साधारण, प्राबिधिक सेवा र व्यवस्थापन प्रदान गर्ने बैंकबाट १ जना) नियुक्ति, भ्रमण खर्च (नेपाल र भारत भ्रमण गर्दा दैनिक भत्ता १२ हजार तथा अन्य देशमा ५५० अमेरिकि डलर र वास्तविक खर्च) व्यवस्था थप गर्ने, र लेखापरिक्षक नियुक्ति गर्ने लगायतका रहेका छन् ।
राष्ट्र बैंकले मंगलबार मात्र परिपत्र जारी गर्दे बैंक तथा वित्तीय संस्थाहरुलाई जथाभावि विदेश भ्रमण र पुरस्कार लिन कडाई गरेको छ ।
हाल बैंकको चुक्ता पूँजी ६ अर्ब ११ करोड ५२ लाख रुपैयाँ छ । ३३ प्रतिशत बोनसपछि बैंकको चुक्ता पूँजी ८ अर्ब १३ करोड नाघ्नेछ । एभरेष्टले गत आर्थिक बर्षमा एक अर्ब ९८ करोड रुपैयाँ खु्द नाफा गरेको थियो ।
चालु आर्थिक वर्षको पहिलो त्रैमासमा एभरेष्टले ५३ करोड १४ लाख ७४ हजार रुपैयाँ खुद नाफा कमाएको छ ।
२०७४ पुष १२ गते प्रकाशित
वि.सं.२०७४ पुस १२ बुधवार ११:०६ मा प्रकाशित