काठमाडौ । अर्थमन्त्रालयले बजेटसम्बन्धि सबै जानकारी दिने मोवाइल एप सार्बजनिक गरेको छ । सोमबार मन्त्रालयमा आयोजना गरिएको पूर्वबजेट छलफल कार्यक्रममा अर्थमन्त्री कृष्णबहादुर महराले सो एप सार्बजनिक गरेका हुन् ।
एपमार्फत सरकारको बजेटमा के कस्ता कार्यक्रम राखिएको छ, कुन कार्यक्रमको लागि कति बजेट छ लगायतका कुराहरुको जानकारी पाउन सकिन्छ । साथमा बजेटसँग कुनै गुनासो वा सुझाव भए सो एफमार्फत सर्बसाधारणले त्यस्तो गुनासो वा सुझाव अर्थमन्त्रीसँग राख्न सक्ने ब्यवस्था मिलाइएको बताइएको छ ।
एपमा बजेट कसरी बनिरहेको छ, विगतका बजेटहरु कस्ता थिए भन्ने जस्ता सुचना र जानकारीहरु पाइचार्ट, विभिन्न शिर्षकको आयब्ययको विवरण तथा बजेट भाषणको लाइभ भिडियो हेर्न सकिने छ । यो एप हालको लागि एन्ड्रोइड अपरेटिङ्ग सिस्टम भएको मोबाइलमा उपलब्ध हुनेछ । गुगल प्लेस्टोरमा गएर बजेट एप डाउनलोड गर्न सकिनेछ । आइफोन प्रयोगकर्ताले भने अबको १५ दिनपछि मात्रै सो एप प्रयोग गर्न सक्ने बताइएको छ ।
प्रकाशित मितिः २०७४ जेठ ८
वि.सं.२०७४ जेठ ८ सोमवार १६:०३ मा प्रकाशित
