म्याग्दी । बेनी नगरपालिका–३ मुसुङका कृषकले आलुको बीउ भण्डारण भवन निर्माण गरेका छन् । जिल्ला कृषि विकास कार्यालयको आर्थिक तथा प्राविधिक सहयोगमा सिर्जना बीउ आलु उत्पादन कृषक समूहमा आबद्ध कृषकले भवन निर्माण गरेका हुन् ।
रु ६ लाखको लागतमा निर्माण भएको सो भवनको भण्डारण क्षमता दश मेट्रिक टन रहेको समूहका अध्यक्ष नरबहादुर मगरले जानकारी दिए ।
कृषि कार्यालयको रु २ लाख ६१ हजार अनुदान तथा कृषकको रु तीन लाख ३९ हजार बराबरको श्रमदानमा भवन निर्माण भएको हो । भवन निर्माण गर्न ६० घरधुरीका कृषकले छ दिनका दरले श्रमदान गरेका थिए ।
कृषकलाई गुणस्तरीय आलुको बीउ उपलब्ध गराउने र गाउँ बाहिर बीउ निकासी गरेर आम्दानी बढाउने उद्देश्यले भवन निर्माण गरिएको अध्यक्ष मगरले बताए । यसअघि मुसुङका कृषकले सदरमुकाम बेनीबाट आलुको बीउ लैजाने गरेका थिए ।
आलुको गुणस्तर र उत्पादन बढाउनका लागि पकेट क्षेत्रमा बीउ आलु भण्डारण भवन निर्माण गर्न सघाएको कार्यालयका प्राविधिक सहायक श्यामराज क्षेत्रीले बताउए ।
प्रकाशित मितिः २०७४ जेठ ३१
हामी धादि
वि.सं.२०७४ जेठ ३१ बुधवार १४:५९ मा प्रकाशित
