काठमाडौं । बुटवल पावर कम्पनी लिमिटेडले ३० लाख कित्ता फरदर पब्लिक अफरिङ (एफपिओ) जारी गर्ने भएको छ । कम्पनीले हिजो सोमबार बसेको सञ्चालक समितिको बैठकले उक्त संख्यामा प्रिमियममा एफपिओ निष्काशन गर्ने निर्णय गरेको हो । 
सञ्चालक समितिले निष्काशन गर्ने प्रस्ताव गरेको ३० लाख कित्ता एफपिओ पारितका लागि कम्पनीले आगामी असार २७ गते विशेष साधारणसभा बोलाएको छ ।
निष्काशनका सम्बन्धमा कम्पनीले जेठ ३२ गते नेप्सेलाई जानकारी गराएको छ । एफपिओ प्रयोजनका लागि आगामी असार १६ गते बुक क्लोज अर्थात सेयरधनी पूस्तिका बन्द हुने नेप्सेले जनाएकोे छ ।
कम्पनीको वित्तिय अवस्था यस्तो छ
यस कम्पनीले चालू आर्थिक वर्षको तेस्रो त्रैमासमा खुद मुनाफा १९ दशमलव ३८ प्रतिशतले बढेर ५ करोड ८५ लाख रुपैयाँ खुद मुनाफा कमाउन सफल भएको छ । कम्पनीले गत वर्ष सोहि अवधिमा ४ करोड ९० लाख रुपैयाँ कमाएको थियो ।
कम्पनीले चालू आर्थिक वर्षको तेस्रो त्रैमाससम्म आईपुग्दा जगेडाकोषमा १ अर्ब ९९ करोड ६० लाख रुपैयाँ पु¥याएको छ । लगानी १३ लाख रुपैयाँ गरेको छ । कम्पनीको सञ्चालन आम्दानी २४ दशमलव १५ प्रतिशतले वृद्धि भई ४७ करोड ८२ लाख रुपैयाँ रहेको छ भने सञ्चालन खर्च १५ दशमलव ११ प्रतिशतले घटेर १९ करोड ११ लाख रुपैयाँ रहेको छ ।
बुटवल पावरको प्रतिशेयर आम्दानी ३५ रुपैयाँ रहेको छ भने मुल्य आम्दानीको अनुपात १७ दशमलव ४ गुणा रहेको छ । कम्पनीको प्रतिशेयर नेटवर्थ २ सय १९ दशमलव ३ रुपैयाँ रहेको छ ।
प्रकाशितः २०७३ जेठ ३२
वि.सं.२०७३ जेठ ३२ मंगलवार १३:५५ मा प्रकाशित
