काठमाडौं। पर्वतारोहण, पदयात्रा, जलयात्रा, प्याराग्लाईडिङ, बञ्जी जम्पिङ जस्ता साहसिक पर्यटकीय गतिविधिका लागि विश्वमै ख्याति कमाएको नेपालमा अर्काे साहसिक गतिबिधि क्यानोनिङ अर्थात् छाँगारोहणबाट मज्जा लिने स्वदेशी र बिदेशी पर्यटकहरुको संख्या बढेर ६ हजार पुगेको छ । नेपाल क्यानोनिङ एसोसियसनले दिएको जानकारी अनुसार मनोरम प्राकृतिक दृष्यावलोकन सँगै भरपुर आनन्द प्राप्त गर्नेहरुको सँख्या दिप्रतिदिन बढ्दै गइरहेको हो ।
स्वदेशी हुन् या बिदेशी क्यानोनिङ प्रति पर्यटकको आकर्षण पनि दिनप्रतिदिन बढ्दै गएको एसोसियसनले जनाएको छ । त्यस्तै नयाँ साहसिक पर्यटकीय गतिबिधि क्यानोनिङको विकास पनि द्रुत भइरहेको छ ।
हिमाली र पहाडी क्षेत्रमा रहेका अग्ला झरना क्यानोनिङको लागि उपयुक्त देखिन्छन् । पर्यटन क्षेत्रका विज्ञहरु पनि भन्छन् नेपालको पहाडी क्षेत्रता अग्ला झरना जुन प्रशस्तै मात्रामा छन्, तीनीहरुमार्फत पर्यटनको महत्वपूर्ण पाटो क्यानोनिङलाई साहसिक खेलकोरुपमा विकास गर्ने प्रशस्तै सम्भावना छन् ।
नेपाल क्यानोनिङ एशोसीएसनका संस्थापक अध्यक्ष तिलक लामा भन्छन् “प्राकृतिक आनन्द दिने र साहसिक गतिविधिमा रुचि राख्नेका लागि क्यानोनिङ खेल एकदमै उपयुक्त छ, नेपालको पहाडी क्षेत्रमा धेरै अग्ला झरना भएकाले यो नयाँ पर्यटकीय गतिविधिका रुपमा विकास गर्न सकिन्छ । ”
अग्ला झरनामा डोरीको सहायताबाट पानीमा भिज्दै तल झर्ने खेल नै क्यानोनिङ हो । एसोसियसनका अनुसार दक्ष व्यावसायिक प्रशिक्षकको सहयोगमा काठमाडौ, काभ्रे, सिन्धुपाल्चोक, नुवाकोट, लमजुङ, कास्की लगायतका देशका २० भन्दा बढी झरनामा व्यावसायिकरुपमा क्यानोनिङ गरिंदै आएको छ ।
प्रकाशित मिति ः २०७३ असार १८
वि.सं.२०७३ असार १८ शनिवार १२:३९ मा प्रकाशित
