पाँचथर । पाँचथरको फालेलुङ गाँउपालिका–४ मा चौँरी महोत्सव हुने भएको छ । चौँरी संस्कृतिको विकास गर्दै जैविक विविधताको संरक्षण र जिल्लाका उच्च पहाडी क्षेत्रलाई पर्यटकीय क्षेत्रको रुपमा चिनाउने उद्देश्यले महोत्सव आयोजना गर्न लागिएको हो । सुर्केथाम दुग्ध उत्पादक सहकारी संस्था लिमिटेडको आयोजनामा तीन हजार पाँच सय ६० मिटरको उचाईमा रहेको नेपाल, भारतको पश्चिम बंगाल र सिक्किमको सिमानामा रहेको चारराते भन्ने स्थानमा नयाँ वर्ष २०७४ को अवसर पारेर वैशाख १ गते महोत्सव गर्न लागिएको हो ।
चौँरी संस्कृति लोप हुँदै गएकाले त्यसलाई संरक्षण गर्नका लागि महोत्सवको आयोजना गरिएको सुर्केथाम दुग्ध सहकारी संस्थाका सचिव शिल्पकुमार राईले बताए । ‘महोत्सवको तयारी अन्तिम चरणमा पुगेको छ’ राईले भने ‘महोत्सवमा पाँच सय भन्दा बढी चौँरीहरु भेला गरिनेछ ।’
यस क्षेत्रमा लगभग २० चौँरी गोठहरु रहेका छन् । चरन क्षेत्र व्यवस्थित नभएपछि पछिल्लो समयमा चौँरी गोठहरु घट्दै गएपछि विस्तारै चौँरी संस्कृति हाराएकाले संरक्षणका लागि महोत्सवको तयारी गरिएको हो । ‘चरन क्षेत्रलाई पनि व्यवस्थित गर्नुपर्ने आवश्यकता छ’ राईले भने । ‘यस क्षेत्रमा रहेको तीन हजार हेक्टर जमिनलाई चरण क्षेत्रका लागि बैज्ञानिक रुपमा व्यवस्थित गर्ने हो भने चौरी संस्कृतिलाई जोगाउन सकिन्छ ।’
महोत्सवबाट यहाँको पर्यटनको सम्भावनालाई माथि उठाउने लक्ष्य राखिएको छ । एक वर्षमा १० हजार बोट लालिगुराँस रोप्ने लक्ष्यका साथा महोत्सवकै दिनदेखि यस क्षेत्रमा लालिगुँरास रोप्न सुरु गरिने भएको छ । पाँचथरसहित पूर्वी नेपालका ताप्लेजुङ, इलाम, झापा हुँदै काठमाडौंसहित भारतको सिक्किम र दार्जिलिङका बासिन्दा, पर्यटन व्यवसायी र नागरिक गरी एक हजारले महोत्सवको अवलोकन गर्ने लक्ष्य राखिएको छ ।
महोत्सवमा चौँरीको दूधबाट बनाइएका परिकारहरु, चौँरी र भेडाको उनबाट बनेका बस्तुहरु र लेकाली क्षेत्रमा पाइने जडिबुटी तथा कृषिजन्य बस्तुको स्टलहरु राख्ने तयारी छ ।
प्रकाशित मितिः २०७३ चैत २९
वि.सं.२०७३ चैत २९ मंगलवार १२:१८ मा प्रकाशित