काठमाडौ । पुष्पकमल दाहाल प्रचण्डले कुनै समय चितवनलाई राजधानी बनाउने भनेर केहि वर्ष पहिले व्यापक चर्चा बटुले । अहिले उनी चितवनलाई औधोगिक नगरी बनाउँ भनेर लागेका छन् ।
चितवनका उद्योगी तथा व्यवसायीले जिल्लाको शक्तिखोरलाई औद्योगिक नगरीको रुपमा विकास गर्न प्रधानमन्त्री पुष्पकमल दाहाललाई आग्रह गरेपछि उनले व्यवसायीलाई उक्त आश्वासन दिएका हुन् ।
चितवन उद्योग सङ्घका प्रतिनिधिले शनिबार प्रधानमन्त्री निवास बालुवाटारमा गरेको भेटवार्ताका क्रममा शक्तिखोरमा औद्योगिक क्षेत्र स्थापना गर्न र त्यसको लागि आवश्यक पहल गरिदिन प्रधानमन्त्रीसमक्ष आग्रह गरेका हुन् ।
शक्तिखोरमा हाल दुई हजार ५०० बिगाहा जग्गा रहेको भन्दै प्रतिनिधिमण्डलले जग्गाको संरक्षण एवम् औद्योगिक क्षेत्रको विकास एवम् आर्थिक समृद्धिका लागि उपयुक्त थलो रहेको बताए ।
प्रतिनिधिमण्डलले चितवनमा औद्योगिक प्रदर्शनी केन्द्र स्थापनामा पनि सहयोग गरिदिन पनि आग्रह गरेको छ ।
प्रतिनिधिमण्डलको आग्रहपछि प्रधानमन्त्री दाहालले चितवनलाई औद्योगिक नगरी बनाउने विषय रणनीतिक महत्वको विषय भएकाले त्यसलाई पूर्ण सहयोगका साथ अगाडि बढाउन आफू तयार रहेको बताएका थिए ।
प्रधानमन्त्रीले चितवन जिल्लाको विकास निर्माण र आर्थिक गतिविधि बढाउन सरकारको तर्फबाट आफुले गर्ने निर्णय पर्खन भनेका छन् ।
प्रकाशित मिति : २०७३ भदौ ११
वि.सं.२०७३ भदौ ११ शनिवार १७:१४ मा प्रकाशित