काठमाडौ । नेपाल नागरिक उड्डयन प्राधिकरणमा आउट सोर्सिंङमा कार्यरत श्रमिकहरुले गत पुस महिनाको मासिक पारिश्रमिक नपाएको भन्दै तालाबन्दी गर्ने धम्की दिएका छन् । प्राधिकरण व्यवस्थापन र ठेकेदार कम्पनीको आपसी खिचातानी र मिलेमतोको मार मजदुरहरुलाई पारेको र गत पुस महिनाको तलब नदिएको भन्दै उनीहरु आन्दोलित भएका हुन् । आन्दोलित मजदुरले यस विषयमा पटक–पटक व्यवस्थापन र ठेकेदार कम्पनीको ध्यानाकर्षण गराउँदा समेत कुनै सुनुवाई नभएपछि आन्दोतिल हुन बाध्य भएको बताएका छन् । आफुले पाउनुपर्ने रकम माग गर्दा उल्टै धम्की दिने गरेको भन्दै आक्रोशित मजदुरले प्राधिकरण कार्यालयमा भोलि शुक्रबार तालाबन्दी गरिदिने चेतावनी दिएका हुन् ।
नागरिक प्राधिकरण अन्तर्गत त्रिभुवन अन्तर्राष्ट्रिय विमानस्थलमा कार्यरत ३५० भन्दा बढि मजदुरलाई पिडामा पारेको भन्दै मजदुर विरुद्धको ज्याजतीको डटेर सामना गर्ने यूनिट्राभका महासचिव सुमन पराजुलीले आक्रोशित शैलिमा बताए । बिहिबार कार्यालय समय अबधिभित्र मजदुरहरुले पाउनुपर्ने पुस महिनाको तलब र वृद्धि भएको मजदुरहरुको मासिक तलब उपलब्ध गराउन उनले माग गरे । यदि बिहिबारको अल्टिमेटमलाई बेवास्ता गरिए एयरपोर्टका दैनिक कार्यहरु समेत प्राभावित पार्नेगरी आन्दोलन अगाडि बढाईने उनले चेतावनी दिए ।
नागरिक उड्डयन प्राधिकरण बोर्ड बैठकले यसअघि गरेको निर्णयअनुसार मजदुरहरुले गत साउनदेखि पुससम्मको दैनिक रकम मिलान गर्नुपर्ने अवस्था रहेको बताईएको छ ।
प्रकाशित मितिः २०७४ बैशाख २१
वि.सं.२०७४ वैशाख २१ बिहीवार ११:०४ मा प्रकाशित