काठमाण्डौं । ओरियन्टल सहकारीबाट पीडित बनेकाहरुले विहीबार बिहान प्रधानमन्त्री निवास बालुवाटार घेराउ गरेका छन् । केही दिन अघि मात्र सुधीर बस्नेतले काम गर्ने वातावरण पाऊँ भन्दै निवेदन दिएको थाहा पाएपछि आज उनको कारवाहीको माग गर्दै सर्वसाधारणले बालुवाटार घेराऊ गरेका हुन् ।
बालुवाटार घेराउ गर्न ठूलो संख्यामा सहभागी भएका पीडितहरुले बस्नेतविरुद्ध नाराबाजी गर्नुका साथै उनलाई संरक्षण नगर्न सरकारसँग माग गरेका छन् । आन्दोलनकारी बालुवाटारको सडकमा सुतेका छन् ।
केही दिन अघि व्यवस्थापिका सांसदको अर्थ समितिले व्यवसायी बस्नेतलाई तत्काल पक्राउ गरी सर्वसाधारणको रकम फिर्ता गर्न सरकारलाई निर्देशन दिएको थियो । संसदीय समितिको निर्देशन आएपछि बस्नेतले सहकारी विभागमा काम गर्ने वातावरण बनाइदिन आग्रह गर्दै निवेदन दिएका थिए ।
विशेष अदालतका पुर्वसंयोजक गौरीबहादुर कार्कीको संयोजकत्वमा सरकारले गठन गरेको समस्याग्रस्त सहकारीका लागि उच्चस्तरीय जाँचबुझ आयोगमा बस्नेतविरुद्ध करिब ७ हजार सर्वसाधारणले ९ अर्ब रुपैयाँभन्दा बढी ठगी गरेको भन्दै उजुरी दिएका थिए ।
२० जेठ २०७३, ११.३०
वि.सं.२०७३ जेठ २० बिहीवार १२:११ मा प्रकाशित