काठमाडौ । मध्य अमेरिकी देश एल साल्भाडोरका पूर्व राष्ट्रपति भ्रष्टाचारको आरोपमा पक्राउ परेका छन् । पूर्व राष्ट्रपति इलियास एन्टोनियो साका सार्वजनिक कोषको दशौं लाख डलर हिनामिना गरेको अभियोगमा पक्राउ परेको बिबिसीले जनाएको छ ।
साकाको सरकारका पूर्व ६ अधिकारी पनि पक्राउ परेको सरकारी अधिकारीले बताएका छन् । साकाले आरोपका बारेमा अहिलेसम्म केही प्रतिक्रिया दिएका छैनन् । उनी सन् २००४ देखि २००९ सम्म एल साल्भाडोरको राष्ट्रपति थिए । गएको १६ वर्षमा सत्तामा रहेका मध्ये साका भ्रष्टाचार आरोपमा छानबिनको घेरामा आएका तेस्रो व्यक्ति हुन् ।
साकापछि सत्तामा आएका माउरिसियो फुनेस र सन् १९९९ देखि २००४ सम्म सत्तामा रहेका फ्रान्सिस्को फ्लोरेसमाथि पनि भ्रष्टाचार आरोप अनुसन्धान भइरहेको छ । तर फ्लोरेसको भने गएको जनवरीमा निधन भएको थियो ।
प्रकाशित मितिः २०७३ कार्तिक १५
वि.सं.२०७३ कात्तिक १५ सोमवार १०:०३ मा प्रकाशित
