काठमाण्डौं । डिप्रोक्स लघुवित्त विकास बैंकले आफ्ना सेयरधनीलाई शतप्रतिशत अर्थात एक बराबर एक हकप्रद सेयर दिने भएको छ । धितोपत्र बोर्डले बैंकलाई हकप्रद जारी गर्ने अनुमति दिएको छ । गत असारमा सम्पन्न बैंकको विशेष साधारणसभाले हकप्रदको प्रस्ताव पारित गरेको थियो ।
हाल बैंकको चुक्ता पूँजी २५ करोड ७९ लाख रुपैंया छ । बैंकले २५ लाख ७९ हजार २३८ कित्ता हकप्रद सेयर निष्कासन गर्नेछ । हकप्रद सेयर वितरण पश्चात कम्पनीको चुक्ता पूँजी ५१ करोड ५८ लाख रुपैयाँ नाघ्नेछ । बैंकले गतबर्षको मुनाफाबाट ३५ प्रतिशत बोनस बाँडेको थियो । बोनस समेत जोड्दा बैंकको पुँजी ६० करोड नाघ्नेछ ।
बैंकको सेयर निष्कासन तथा बिक्री प्रबन्धकमा नबिल इन्भेष्टमेन्ट बैकिंग लिमिटेड रहेको छ । बैंकले ४७ जिल्लाका ८१ शाखाबाट लघुवित्त सेवा प्रदान गरिरहेको छ । कम्पनीले चालु आर्थिक बर्षको असोज मसान्तसम्म बैंकले ६ करोड ९३ लाख खुद नाफा कमाएको थियो ।
१० माघ २०७३, ११।००
वि.सं.२०७३ माघ १० सोमवार ११:०१ मा प्रकाशित
