काठमाण्डौं । लगातारको वर्षासँगै आएको बाढी र पहिरोका कारण धनजनको ठूलो क्षति भएपछि गृह मन्त्रालय अन्तर्गतको दैवी प्रकोप उद्धार समितिको बैठकले आपतकालीन उद्धार र राहतका लागि प्रधानमन्त्री राहत कोषबाट ७५ करोड रुपैयाँ माग गरेको छ ।
आज बुधबार बिहान बसेको बैठकले बाढी तथा पहिरोबाट विस्थापित भएकाहरुलाई तत्काल सामुहिक आवास भए त्यसमा र नभए त्रिपालहरुमा सार्ने निर्णय गरेको छ । यसका साथै, बैठकले बाढी प्रभावित क्षेत्रमा झाडापखाला, हैजा जस्ता महामारी फैलन सक्ने भन्दै सतर्कता अपनाउने निर्णय गरेको छ । यसका लागि स्वच्छ पानीका साथै आवश्यकताअनुसार खाद्यान्न, दाल, जुन सम्भव भए सडकमार्गबाट र आवश्यक परे हेलिकोप्टरबाट पनि पठाउन निर्देशन दिइएको छ ।
बैठकले बाढी पहिरो प्रभावित क्षेत्रमा उद्धार तथा राहत नपुगेको भए स्थानीय प्रहरीलाई खबर गर्न भनेको छ । यसका लागि नेपाल प्रहरीको हटलाइन १०० मा खबर गर्न गृह मन्त्रालयले अपील गरेको छ ।
१२ साउन २०७३, १२।००
वि.सं.२०७३ साउन १२ बुधवार १३:१३ मा प्रकाशित
