काठमाण्डौं । सरकारले पेट्रोलियम पदार्थमा पूर्वाधार कर लगाएपनि तत्काल मूल्य नबढ्ने भएको छ ।
अर्थमन्त्री विष्णु पौडेलले संसदमा पेश गरेको बजेटमा पेट्रोल, डिजेल र हवाइ इन्धनमा ५ रुपैयाँ पूर्वाधार कर लगाउने उल्लेख छ । यो रकम बुढिगण्डकी जलविद्युत आयोजना निर्माणमा खर्च गरिने भनिएको छ ।
तर, आयल निगमले पूर्वाधार कर लाग्दैमा तत्काल मूल्य नबढ्ने बताएको छ । बजेट निर्माणका क्रममा अर्थ मन्त्रालयले पूर्वाधार कर लगाउने बारे आयल निगमसँग परामर्श गरेको थियो । त्यसबेला नै तत्काल उपभोक्तालाई भार नपर्ने गरी कर लगाउन आयल निगमले सहमति जनाएको स्रोतले बताएको छ । अर्थमन्त्रीले बजेट भाषणमा पनि उपभोक्तालाई अतिरिक्त भार नपर्ने गरी यो कर प्रस्ताव गरेका थिए ।
१६ जेठ २०७३, १०।००
वि.सं.२०७३ जेठ १६ आइतवार ११:३६ मा प्रकाशित