काठमाडौ । नेपाल आयल निगम (एनओसीले) ले पेट्रोलियम पदार्थको मूल्य बढाएको छ । निगमले गएराती १२ बजेबाट लागु हुने गरी खाना पकाउने एलपि ग्यास, पेट्रोल, डिजेल र मट्टीतेलको मूल्य एकै पटक बढाएको हो ।
पेट्रोलमा प्रतिलिटर २ रुपैयाँ, डिजेलमा र मट्टीतेल १.५० रुपैयाँ तथा खाना पकाउने ग्यासमा प्रति सिलिण्डर २५ रुपैयाँ मूल्य समायोजन गरिएको निगमले जनाएको छ । नयाँ मूल्य अनुसार अब पेट्रोल प्रतिलिटर १ सय रुपैयाँ भएको छ । डिजेल र मट्टीतेलको मूल्य प्रति लिटर ७५.५० रुपैयाँमा पुगेको छ । २५ रुपैयाँ बढेर खाना पकाउने ग्यासको मूल्य १३ सय ५० रुपैयाँमा पुगेको छ ।
निगमका अनुसार भारतीय आयल कर्पोरेशन (आइओसी) ले निगमले खरिद गर्ने पेट्रोलियमको मूल्य बढाएकाले स्थानीय बजारमा पनि मुल्य समायोजन गरिएको हो ।
अन्तराष्ट्रिय बजारमा कच्च तेलको मुल्य बढेकाले आइओसीले पनि निगमलाई बढाएर पेट्रोलियम पठाएको हो । अहिलेको मूल्य समायोजनले निगमलाई भने पाक्षिकरूपमा १ करोड ९७ लाख रुपैयाँ नाफा हुनेछ ।
वि.सं.२०७४ कात्तिक १६ बिहीवार ०८:३० मा प्रकाशित