काठमाडौ । स्थापनादेखि हरेक वर्ष ५ प्रतिशत लाभांश बाँड्दै आएको जलविद्युत लगानी तथा विकास कम्पनीले यसलाई १० प्रतिशत पुर्याउने भएको छ । लगानीको दायरा फराकिलो बनाउँदै सोही अनुरूप लाभांश दिने योजना अघि सारेको हो ।
चालु आर्थिक वर्षमा नसके पनि आगामी आवदेखि लगानीकर्तालाई तोकिएको नाफा बाँडिने कम्पनीका प्रमुख कार्यकारी अधिकृत छविराज पोखरेलले बताए । ‘सोचेअनुसार लगानी विस्तार हुन सकेको छैन,’ उनले भने, ‘यही वर्ष नसके पनि आगामी आवमा लाभांश बढाउँछौं ।
सरकारले ७ वर्षभित्र १७ हजार मेगावाट विद्युत उत्पादनको लक्ष्य राखेको छ । सन् २०२५ सम्म १९ हजार मेगावाट खपत गर्न हुने अनुमान छ । यसैलाई लक्षित गरी कम्पनीले ५ वर्षे योजना बनाएको छ । यो योजनाअनुसार काम गर्दा १० प्रतिशत लाभांश दिन समस्या नहुने पोखरेलको भनाइ छ ।
कम्पनीका अनुसार आगामी ५ वर्षभित्र अहिले लगानी भइरहेका बाहेक ३ हजार ५ सय मेगावाटका १८ आयोजनामा लगानी हुनेछ । यसो हुँदा हरेक वर्ष आम्दानीको दायरा फराकिलो हुँदै जानेछ । बैंक ब्याजबाट प्राप्त रकमले पनि सयरधनीलाई लाभांश दिन सकिनेमा कम्पनी ढुक्क छ ।
अहिले ७ आयोजनाका लागि लगानीको प्रस्ताव आएको छ । यसबारे कम्पनीले अध्ययन गरिरहेको छ । योसँगै वैदेशिक रोजगारमा गएका युवाले कमाएको रकम आयोजनामा परिचालन गर्ने गरी अर्थ मन्त्रालयको सहकार्यमा ‘रेमिट हाइड्रो कम्पनी’ ले पनि काम सुरु गरेको छ ।
रेमिट हाइड्रोमा कम्पनीको ५१ प्रतिशत सेयर छ । स्थानीयको १० प्रतिशत र बाँकी वैदेशिक रोजगारीमा गएका कामदारको लगानी हुनेछ । यसअन्तर्गत पाँचथरमा १ सय २५ मेगावाटका घुन्सा र सिम्बुवा आयोजना अघि बढाइएको छ ।उर्जाखबरबाट
प्रकाशित मितिः २०७४ असार ५
वि.सं.२०७४ असार ५ सोमवार १०:४४ मा प्रकाशित
