काठमाण्डौं । भूकम्पबाट अति प्रभावित ११ जिल्लाका पीडितले पहिलो किस्ताको ५० हजार रुपैयाँ लिई पुनःनिर्माण सुरु गरेपछि त्यसको निरीक्षण हुने भएको छ । यसका लागि राष्ट्रिय पुनःनिर्माण प्राधिकरणले निजी आवास पुनःनिर्माण प्राविधिक निरीक्षण कार्यविधि, २०७३ तयार पारेको छ ।
भूकम्पबाट क्षति भएका निजी घर पुनःनिर्माण, प्रवलीकरण वा मर्मत गर्नुपर्ने संरचना, भूकम्प प्रतिरोधात्मक बनाउनका लागि सिफारिस गरिएको प्राविधिक ढाँचा र निर्माणमा प्रयोग हुने सामग्रीको गुणस्तर यकिन गर्न निरीक्षण कार्यविधि तयार पारिएको प्रवक्ता रामप्रसाद थपलियाले बताए।
“पुनःनिर्माण कार्यमा खटिएका प्राविधिकहरुका लागि निरीक्षणको एकीकृत प्रक्रिया तोक्न आवश्यक भएकाले पनि कार्यविधि तयार पारिएको हो, कार्यविधिमा निजी आवास पुनःनिर्माण कार्यक्रमअन्तर्गत बन्ने घरको निरीक्षण प्रक्रियासमेत उल्लेख गरिएको छ” –उनले भने।
कार्यविधिमा नक्सा पास प्रक्रिया, निर्माण कार्यको निरीक्षणजस्ता पुनःनिर्माणसँग सम्बन्धित विषय उल्लेख गरिएको छ । घर पुनःनिर्माण कार्य सम्पन्न, प्रवलीकरणरमर्मत सम्भार कार्यको निरीक्षण प्रक्रिया, तेस्रो पक्षबाट प्राविधिक अनुगमन, अनुदान सम्झौताअगावै पुनःनिर्माण भएका घरको निरीक्षण प्रक्रियाजस्ता विषय पनि कार्यविधिमा उल्लेख गरिएको प्रवक्ता थपलियाले बताए।
२६ कार्तिक २०७३, १।००
वि.सं.२०७३ कात्तिक २६ शुक्रवार १४:२३ मा प्रकाशित