काठमाण्डौं । भूकम्पबाट पूर्ण रूपमा क्षति भएको घर पुनर्निर्माण गर्नका लागि पुनर्निर्माण प्राधिकरणले दोलखा पछि थप १० जिल्लाबाट पुनर्निर्माणको पहिलो किस्ता वितरण गर्ने तयारी गरेको छ ।
प्राधिकरणले राष्ट्रिय वाणिज्य बैंकसँग छलफल गरेर जिल्लाको नाम छुट्याउनेछ । हाल दोलखाको सिंगटीमा पुनर्निर्माण अनुदान अन्तर्गतको पहिलो किस्ता वितरण भइरहेको छ । सरकारले पूर्ण रूपमा घर क्षति भएका परिवारलाई २ लाख रुपैयाँ अनुदान उपलब्ध गराउने घोषणा गरेको थियो । यसमध्ये पहिलो किस्ता ५० हजार रुपैयाँ वितरणको काम सुरु भएको हो ।
हालसम्म दोलखाको लामीडाँडा र लादुक गाविसमा ६ सय ४७ परिवारलाई अनुदान दिने सम्झौता भइसकेको छ । लादुकका २ सय ५० र लामीडाँडाका २ सय ९१ जनाबीच घर पुनर्निर्माण अनुदानको सम्झौता भएको हो ।
१६ चैत २०७२, ८.००
वि.सं.२०७२ चैत १६ मंगलवार ११:२३ मा प्रकाशित