काठमाडौँ । सरकारले आफ्नो नीति तथा कार्यक्रममार्फत आगामी एक वर्षभित्र देशलाई अन्डामा आत्मनिर्भर बनाउने लक्ष्य अनुसार साउन देखि ग्रामीण कुखुरा प्रवर्द्धन कार्यक्रम लागू गरेको पशुपक्षी विभागले जनाएको छ ।
नेपाल अण्डा उत्पादक संघका अनुसार हाल दैनिक २० लाख वटा अन्डा व्यावसायिक रुपमा उत्पादन भइरहेको छ । अहिले बजारमा अन्डाको खुद्रा मूल्य प्रतिवटा १३ रुपैयाँ तिर्नुपर्छ । व्यापारीले ११ रुपैयाँ तिरेर अन्डा आयात गर्दा वार्षिक एक अर्ब १० करोडको अन्डा भारतबाट आयात हुँदै आएको अनुमान गरिएको छ ।
पशुपक्षी विकास मन्त्रालयको तथ्याङकअनुसार हाल वार्षिक ९० करोड वटा अन्डा यहाँ उत्पादन हुन्छ । आगामी एक वर्षपछि सो उत्पादनमा ११ दशमलव ११ प्रतिश वृद्धि गर्न सक्दा मात्र एक वर्षभित्र नेपाल अन्डा उत्पादनमा आत्मनिर्भर हुने लक्षण देखिन्छ । व्यावसायिक रुपले अन्डा उत्पादन हुँदा वार्षिक ७२ करोड वटा र ग्रामीण क्षेत्रमा स्थानीय जातका कुखुराबाट १८ करोड गरी ९० करोडवटा अन्डा स्वदेशमा उत्पादन हुने गरेको संघले बताएको छ ।
आगामी वर्ष अन्डामा आत्मनिर्भर हुन सरकारले साउनदेखि ग्रामीण कुखुरा प्रवर्द्धन कार्यक्रम लागू गरेको छ । सो कार्यक्रम पूर्णरुपमा लागू भएपछि यहाँ वार्षिक झन्डै एक अर्बवटा अन्डा उत्पादन हुने अनुमान गरिएको छ ।
२६ साउन २०७३, १२।३०
वि.सं.२०७३ साउन २६ बुधवार १३:१७ मा प्रकाशित