बैतडी । बैतडीको पुरचौडी नगरपालिका वडा नम्बर ७ मा वडा अध्यक्ष पदका लागि बुवा छोराबिच प्रतिस्पर्धा हुने भएको छ । पुरचौडी नगरपालिकाको वडा नं ७ मा नेकपा एमालेका तर्फबाट ६८ वर्षका नागी साउद अध्यक्ष पदका उम्मेद्वार बनेका छन् भने उनका छोरा उज्ज्वल साउद माओवादी केन्द्रबाट अध्यक्ष पदको उम्मेद्वार बनेका छन् ।
नातामा बुवाछोरा भए पनि वैचारिक भिन्नता भएपछि आफूहरुले अलग अलग पार्टीबाट उम्मेद्वार बनेको उज्ज्वल साउदले बताए । अहिले बुवा छोरा आ–आफ्नो पार्टीबाट प्रचाप्रसारमा जुटिरहेका छन् ।
बुवा नागी साउदले २०५४ सालको स्थानीय निर्वाचनमा साविकको कोटिला गाविसको अध्यक्ष पदमा निर्वाचित भएर काम गरेकाले आफूले अहिले वडाको विकासका लागि उम्मेद्वारी दिएको बताए । नाताले छोरा भए पनि उज्ज्वलसँग वैचारिक भिन्नता भएकाले आफूले उम्मेद्वारी दिएको उनले बताए ।
नागी साउद पहिलेको निर्वाचनमा जितेकाले आफूले वडा अध्यक्ष पदमा जित्ने बताउँछन् भने उज्ज्वल साउद आफूले युवाको प्रतिनिधित्व गर्ने भएकाले जित्ने दाबी गर्छन् । एकैघरका दुईजना उम्मेद्वार बनेपछि घरपरिवारका अन्य सदस्यहरुलाई भने मतदानका बिषयमा अलमल परेको छ । नागी साउदकी श्रीमती नन्दा साउदलाई सबैभन्दा बढी समस्या भएको छ । श्रीमान र छोरा दुवै उम्मेद्वार बनेपछि उनी कसैलाई पनि भोट नहाल्ने मनस्थितिमा पुगेकी छिन् ।
प्रकाशित मितिः २०७४ जेठ ३०
वि.सं.२०७४ जेठ ३० मंगलवार ०८:४६ मा प्रकाशित
