प्रदेश नम्बर २ का स्थानीय तहमा शान्तिपूर्ण रुपमा सम्पन्न भएको मतदानमा ७३ प्रतिशत भोट खसेको निर्वाचन आयोगले प्रारम्भिक अनुमान गरेको छ।
१ सय ३६ वटा स्थानीय तहका सबै मतदान केन्द्रमा विना कुनै हिंसा मतदान शान्तिपूर्ण र उत्साहजनक रुपमा सम्पन्न भएको आयोगले जनाएको छ।
मतदानको पूर्वसन्ध्यामा आयोजित पत्रकार सम्मेलनमा उत्साही रुपमा प्रस्तुत प्रमुख निर्वाचन आयुक्त अयोधीप्रसाद यादव मतदान सम्पन्न भएपछिको पत्रकार सम्मेलनमा थप हौसिएका र प्रसन्न देखिन्थे।
८ वटा जिल्लामा एउटा महानगर सहित १३६ वटा स्थानीय तहमा जनप्रतिनिधि चयन गर्न बिहानैदेखि भोट खसाल्न मतदाता लाइनमा बसेका थिए।
मतदाताको त्यही उत्साहका कारण प्रमुख निर्वाचन आयुक्त अयोधीप्रसाद यादवले भने , करिब ७३ प्रतिशत मतदान भएको प्रारम्भिक अनुमान छ।
डुबान र कटानको दुःखलाई सहेर भएपनि मतदाताहरुले देखाएको व्यापक सहभागिताले लोकतन्त्र र जनताको अधिकारलाई बलियो बनाउन सहयोग पुगेको अनुभव आयोगले गरेको छ।पहिलो र दोस्रो चरणको निर्वाचनमा करिब ७४ प्रतिशत मत खसेको थियो।
ती दुवै चरणमा केही ठाउँमा पुनः मतदान गराउनु परे पनि प्रदेश २ मा त्यस्तो अवस्था आएन।
प्रकाशित मितिः२०७४ असोज २
वि.सं.२०७४ असोज २ सोमवार २१:५५ मा प्रकाशित