काठमाडौ। दक्षिण कोरियामा रोजगारीका लागि ७५ हजार ६ सयभन्दा बढी युवाले आवेदन दिएका छन् । कोरियाले यो पटक १० हजार २ सय नेपालीलाई लैजानेछ ।
तर, आगामी जेठ २७ र २८ गते सञ्चालन हुने भाषा परीक्षामा सामेल हुन साढे ७५ हजार बढीको आवेदन परेको छ ।
अहिले आवेदन रुजु गर्ने काम भइरहेको इपीएस कोरिया शाखाले जनाएको छ । गत वर्ष ६० हजार परीक्षार्थी सहभागी भएका । तर, यो पटक कोटा बढेका कारण पनि धेरैको आवेदन परेको छ ।
‘गतवर्षभन्दा यो वर्ष १५ हजार बढीको आवेदन परेको छ’ इपीएस कोरिया शाखाका सूचना अधिकारी शोभाकर भण्डारीले बताए ।
यसपटक अनलाइनमार्फत आवेदन लिइएको थियो ।
कोरिया जानका लागि उत्पादनमूलक समूहमा २४ हजार ३८७ जनाले आवेदन दिएका छन् भने कृषि समूहमा ५१ हजार २२० जनको आवेदन परेको भण्डारीले बताए ।
यो वर्ष परीक्षा दिनेमध्येबाट कृषितर्फ ६ हजार २ सय र उत्पादनमूलक क्षेत्रतर्फ ४ हजार कामदार उर्त्तीण हुनेछन् ।
उनले चैत २०देखि अनलाइन आवेदनमा कुनै गल्ति भए सच्याउन सकिने गरी २५ गतेसम्म सुनुवाईको ब्यवस्था गरिएको बताए ।
‘अनलाइन आवेदन दिँदा कुनै विवरण गल्ती भएको भए फोनमार्फत नै सच्याउन सकिनेछ ‘ उनले भने, ‘एमहापी र फोटो एट्याच गर्न छुटेको भए हाम्रो ग्वार्कोस्थित कार्यालयमा आएर बुझाउन सकिनेछ ।’
उनले ५ दिनसम्म टेलिफोन नम्बर ०१–५१८६३४९ मा कल गरेर आवदेकको विवरण सच्याउन सकिने बताए ।
प्रकाशित मितिः २०७३ चैत १९
वि.सं.२०७३ चैत १९ शनिवार १४:३६ मा प्रकाशित
