काठमाडौ । ३९ वर्षका मध्यमार्गी नेता इम्यानुएल म्याक्रोन फ्रान्सको राष्ट्रपतिमा निर्वाचित भएका छन् । नेपोलियन बोर्नापाटदेखि अहिलेसम्म आइपुग्दा परम्परागत मुख्य दुई पार्टी बाहिरबाट राष्ट्रपति बन्ने म्याक्रोन पहिलो व्यक्ति हुन् ।
फ्रान्सको इतिहासमा कम उमेरमा राष्ट्रपतिमा निर्वाचित म्याक्रोनले दक्षिण पन्थी नेतृ मरिन ली पेनलाई हराएर राष्ट्रपतिमा निर्वाचित भएका हुन् । म्याक्रोनले ६६ प्रतिशत भन्दा बढी मत पाए भने ली पेनले झण्डै ३४ प्रतिशत मत पाईन्।
पूर्व इन्भेस्टमेन्ट बैंकर म्याक्रोनले १३ महिनाअघि एन मार्चे (अन द मुभ) पार्टी बनाएर राजनीति सुरु गरेका थिए । त्यसबेला तत्कालिन सरकारमा अर्थमन्त्री रहेका म्याक्रोनले एन मार्चे गठन गरेको केही महिनापछि राजीनामा दिएर राष्ट्रपतिमा उम्मेद्वारी घोषणा गरे । आक्रामक तथा प्रभावकारी चुनावी अभियानका कारण म्याक्रोनले किशोर किशोरी, युवा, प्रौढलाई प्रभावित पारे । मतदानको समयसम्म आइपुग्दा म्याक्रोनको प्रभाव पाका उमेरका फ्रान्सेली नागरिकमा पनि पर्यो ।
युरोपियन युनियनको पक्षमा रहेका म्याक्रोनले फ्रान्समा रहेको वर्ग समस्या अन्त्य गरी नागरिकमा आशाको सञ्चार गर्ने प्रतिबद्धता जनाएका छन् ।
म्याक्रोनले इयुको विपक्षमा रहेकी मरिन ली पेनलाई हराएर राष्ट्रपति बनेपछि फ्रान्स इयुमा रहने नरहने विवाद लगभग टुंगिएको विश्लेषण गरिएको छ । इयुका जिन–क्लाउडे ज्यानकरले फ्रान्सले युरोपको भविष्यलाई चुनेको बताए । उनले ट्वीट गरेर फ्रान्सले युरोपको भविष्य चुनेकोमा खुशी रहेको र एकीकृत तथा पारदर्शी इयुका लागि काम गर्नुपर्ने बताएका छन् ।
युरोपियन काउन्सिलका अध्यक्ष डोनाल्ड टुस्कले स्वतन्त्रता, समानता र भातृत्वको पक्षमा मत दिएकोमा फ्रान्सेली नागरिकलाई धन्यवाद दिएका छन् । अमेरिकाका राष्ट्रपति डोनाल्ड ट्रम्पले पनि विजयी भएका म्याक्रोनलाई बधाई दिएका छन् । उनले सहकार्यमा काम गर्न चाहेको बताएका छन् ।
यस्तै गएको नोभेम्बरमा ट्रम्पसँग पराजित हुनुभएकी हिलारी क्लिन्टनले म्याक्रोनको जित विश्वका लागि भएको बताएकी छिन् । म्यानक्रोनका जित फ्रान्स, इयु तथा विश्वका लागि रहेको उनले बताईन् ।
बेरोजगारीको अन्त्य र आतंकवादको नियन्त्रण म्याक्रोनको सबैभन्दा ठूृलो चुनौती रहेको विश्लेषकले बताएका छन् । म्याक्रोनले आउँदो आइतबार जिम्मेवारी सम्हाल्नेछन् ।
प्रकाशित मितिः २०७४ बैशाख २५
वि.सं.२०७४ वैशाख २५ सोमवार १३:४० मा प्रकाशित