काठमाडौ । नाटक अभिनयकै क्रममा मृत्यु भएका कलाकार विष्णुभक्त फुँयाललाई नेपाल ट्रेड युनियन महासंघले इमान्दार र समाजमा भएको अन्याय नसहने पात्रकोरुपमा सम्झिएको छ । जिफन्ट र नेकपा(एमाले) राजधानी बिशेष जिल्ला कमिटीले नेपाल पर्यटन बोर्डमा श्रद्धाञ्जली सभा आयोजना गरी उनलाई जनकलाकारका साथै सामाजिक अभियन्ता र सशक्त मजदुर नेताको रुपमा सम्झिएको हो ।
१५ वर्षको कलिलो उमेरमा साबेलको बेल्चा समाएर मजदुर क्षेत्रमा लागेका फुँयाल जिफन्ट बरिष्ठ युनियनकर्मी संजालका सदस्य थिए । लामो समय होटल क्षेत्रमा काम गरेका फुँयाल २०३५ सालदेखि ट्रेड युनियन आन्दोलनमा लागेका थिए । २०४२ सालदेखि उनले ट्रेड युनियन आन्दोलन र कलाकारितालाई सँगसँगै अगाडि बढाएका थिए ।
कार्यक्रममा उनलाई सम्झंदै जिफन्ट अध्यक्ष विष्णु रिमालले कामदारमाथि भएको शोषणका विरुद्ध सँधै आवाज उठाउने सशक्त व्यक्तिकोरुपमा फुँयाललाई पाएको भन्दै उनले सिकाएका राम्रा काम र विचारलाई जिफन्टले कहिल्यै नभुल्ने बताए ।
त्यस्तै फुँयालका जेठा छोरा बीमल फुँयालले स्वर्गीय पिता विष्णुभक्त फुँयालको नाममा पारिवारिक ट्रष्ट खोलिने बताए । उनले समाजमा अन्याय अत्याचार नसहने व्यक्ति अर्थात सामाजिक अभियन्ता, मजदुर नेता र रंगकर्मी तीन कोणबाट आफ्ना पिता स्वर्गीय विष्णुभक्त फुँयाललाई सम्झनुपर्ने बताएका थिए ।
कार्यक्रममा जिफन्टका महासचिव विष्णु लम्सालले स्वर्गीय फुँयालले सिकाएको पथ र जिफन्टमा कैद भएका फुँयालका रेकर्ड सामाग्रीलाई श्रव्यदृष्यका माध्यमबाट बिधार्थी र श्रमिकमाझ पुर्याई चेतना फैलाउने काम गरिने बताएका थिए ।
प्रकाशित मितिः २०७३ पुस २७
वि.सं.२०७३ पुस २७ बुधवार १४:५३ मा प्रकाशित
