काठमाडौ । गोर्खाज फाइनान्स लिमिटेडले ५० प्रतिशत हकप्रद सेयर निष्काशन गर्नका लागि सेयरधनी पुस्तिका बन्द गर्ने मिति तय गरेको छ । फाइनान्स सञ्चालक समितिको बैठकले बैशाख २० गते सेयरधनी पुस्तिका बन्द गर्ने निर्णय गरेको हो । फाइनान्सले हकप्रद निष्काशन गर्ने मिति भने सार्वजनिक गरेको छैन ।
फाइनान्सले हाल कायम चुक्ता पूँजी ५७ करोड ८६ लाख ६२ हजारको ५० प्रतिशत अर्थात २८ करोड ९३ लाख ३१ हजार तीन सय रुपैंया बराबरको एक सय रुपैँया अंकित मूल्यको २८ लाख ९३ हजार ३३१ कित्ता हकप्रद जारी गर्देछ । हकप्रद निष्काशन पश्चात चुक्ता पूँजी ८७ करोड रुपैंया हाराहारीमा पुग्नेछ ।
फाईनाइन्सको गत पुस २६ गते सम्पन्न भएको २२ औं बार्षिक साधारणसभाले चुक्ता पूँजीको पचास प्रतिशत हकप्रद सेयर जारी गर्ने प्रस्ताव पारित गरेको थियो । सो प्रस्तावलाई चैत २२ गते धितोपत्र बोर्डले ५० प्रतिशत हकप्रद जारी गर्ने अनुमति प्रदान गरेको थियो ।
प्रकाशित मितिः २०७४ बैशाख ११
वि.सं.२०७४ वैशाख ११ सोमवार १३:३६ मा प्रकाशित