काठमाण्डौं । सरकारले बजेटमार्फत प्रधानमन्त्री कृषि आधुनिकीकरण परियोजना कार्यान्वयनको घोषणा गरेसँगै कृषि विकास मन्त्रालयले परियोजना अन्तर्गत १ खर्ब ४४ अर्ब रुपैयाँ खर्च गर्ने गरी कार्ययोजना बनाएको छ । यो रकम १० वर्षभित्रमा खर्च गरिनेछ ।
सरकारले परियोजनामा आगामी आर्थिक वर्षका लागि जम्मा ५ करोड ७८ लाख रुपैयाँ विनियोजन गरेको छ । प्रधानमन्त्री कृषि आधुनिकीकरण परियोजना स्वदेशी लगानीको पहिलो कृषि परियोजना हो ।
सरकारले कृषि विकास मन्त्रालयलाई आगामी आर्थिक वर्ष ३ अर्ब ८२ करोड २६ लाख रुपैयाँ पूँजीगतसहित २७ अर्ब ४३ करोड ८२ लाख रुपैयाँ बजेट छुट्याएकामा त्यसमा वैदेशिक सहयोगको अंश २३ प्रतिशत छ ।
मन्त्रालयले आज बिहीबार पत्रकार सम्मेलन गरी परियोजनाको दश वर्षे कार्ययोजना सार्वजनिक गरेको हो । सरकारले बजेटमार्फत मुलुकलाई आगामी आर्थिक वर्ष गहुँ र तरकारी, दुई वर्षभित्र धान र आलुमा आत्मनिर्भर बनाउने घोषणा गरेकामा मन्त्रालयले भने धान, गहुँ र मकैमा आत्मनिर्भर हुन तीन वर्ष लाग्ने बताएको छ ।
२ असार २०७३, ४।००
वि.सं.२०७३ असार २ बिहीवार १६:०४ मा प्रकाशित
