बनेपा । कृषकलाई प्रतिलिटर दूधको उत्पादनमा १ रुपैयाँ अनुदान दिन काभ्रेपलाञ्चोकका २ सहकारी संस्थालाई रु १८ लाख ७५ हजार रकम अनुदान प्रदान भएको छ । सेतीदेवी दुग्ध उत्पादक सहकारीलाई रु १२ लाख ३४ हजार र उमादेवी दुग्ध उत्पादक सहकारीलाई रु ६ लाख ४० हजार अनुदान उपलब्ध भएको हो ।
दूध उत्पादनको क्षेत्रमा काम गर्दैआएका अन्य सहकारीलाई क्रमशः रकम हस्तान्तरणको तयारी भइरहेको जिल्ला पशुसेवा कार्यालय, धुलिखेलका प्रमुख डा नारायण श्रेष्ठले जानकारी दिए ।
सहकारी मार्फत अहिलेसम्म कृषकले सबैभन्दा बढी रु ७ हजारसम्म रकम बुझेका छन् । सरकारले कृषकलाई उत्पादनमा प्रति लिटर १ रुपैयाँ अनुदान दिने भएपछि जिल्लाका १२ वटा दुग्ध सहकारी संस्था रकमका लागि छनोट भएका थिए ।
“गोठ, भकारो, घाँस उत्पादन लगायत क्षेत्रमा लगानी गरेपनि खासै उपलब्धिमूलक भएन,” डा श्रेष्ठले भने । १ वर्षको दूध उत्पादनको अवस्था हेरेर दुग्ध सहकारी मार्फत कृषकलाई अनुदान दिइने उनले बताए ।
मूल्याङ्कन समितिमार्फत छनोट गरिएका बनेपा रविओपीको देउराली दूध उत्पादक सहकारीले रु २० लाख ९ हजार, ५ खाल अनोकोटको अनेकोट दुग्ध उत्पादक सहकारीले रु ४ लाख १० हजार, मण्डनदेउपुर नगरपालिका महादेवस्थानको रानीटार दुग्ध उत्पादक सहकारीले रु ६ लाख २३ हजार, ५ खाल नगरपालिकाको शिखरपुर श्रीराम पाटी दुग्ध उत्पादक सहकारीले रु २ लाख १६ हजार तथा देउपुरको ब्रम्हयणी दुग्ध उत्पादक सहकारीले रु १ लाख ८३ हजार वार्षिक अनुदान पाउने छन् ।
त्यस्तै धुलिखेलस्थित कालिदेवी दुग्ध उत्पादक सहकारीले रु २ लाख ९० हजार, ज्यम्दीको ठूल्दीवँेसी दुग्ध उत्पादक सहकारीले रु ३ लाख ५४ हजार, मण्डन देउपुरको इन्द्रवती बहुउद्देश्यीय सहकारीले रु २ लाख ७० हजार, मङ्लटारस्थित तिमाल महाभार बहुउद्देश्यीय सहकारीले रु ९लाख ७८ हजार र देवीपन्चकन्या बहुउद्देश्यीय सहकारीले रु २ लाख ४७ हजार अनुदान पाउने कायार्मलयले जनाएको छ ।
प्रकाशित मितिः २०७४ असार २८
वि.सं.२०७४ असार २८ बुधवार १३:१९ मा प्रकाशित
