काठमाण्डौं । कृषि विकासमन्त्री हरिबोल गजुरेलले किसानलाई निवृत्तिभरणको व्यवस्था बजेट प्रस्तुत गर्दा छुटे पनि त्यसलाई फेरि समावेश गर्ने तयारी भइरहेको बताएका छन्।
‘अष्टज अभियान’ले आज यहाँ आयोजना गरेको ‘बृहत् किसान अन्तक्र्रिया तथा अष्टज अभियान भेला’ कार्यक्रममा मन्त्री गजुरेलले आफूले शुक्रबार मात्रै प्रधानमन्त्रीसँग छलफल गरेको र सकारात्मक जवाफ पाएको बताए।
पहिलो चरणमा सात प्रदेशका सात जिल्लामा किसानलाई निवृत्तिभरण दिने प्रस्ताव मन्त्रालयले तयार पारेको उनले जानकारी दिए।
कृषिको अनुसन्धान मुख्य विषय भएको तथा उन्नत बीउबीजन, प्रविधि, रासायनिक मलको प्रयोगलाई प्राथमिकता दिन आवश्यक रहेकामा जोड दिए। कृषिको विकासका लागि कृषि आयोगको समेत आवश्यकता रहेको उनको भनाइ थियो।
अभियानका अध्यक्ष लोककृष्ण भट्टराईले अष्ट ज अर्थात् जल, जमिन, जडीबुटी, जङ्गल, जलवायु, जनावर, जराजुरी र जनशक्तिको प्रयोगबाट नेपाललाई आत्मनिर्भर बनाउन सकिन्छ भन्ने उद्देश्य सहित अभियान सुरु गरिएको बताए।
प्रकाशितः २०७३ जेठ २२
वि.सं.२०७३ जेठ २२ शनिवार १६:०८ मा प्रकाशित