काठमाडौ । नेपाल धितोपत्र बोर्डमा आवेदन दिइएको आधारमा हेर्ने हो भने यस वर्ष विभिन्न १४ जलविद्युत् कम्पनीको मात्रै प्राथमिक शेयर र थप निष्काशन (एफपिओ) गरी पाँच अर्ब सात करोड रुपैयाँभन्दा बढी शेयर बजारमा आउन लागेको छ । कुल १४ जलविद्युत् कम्पनीले आइपिओ र एफपिओका लागि धितोपत्र बोर्डमा निवेदन दिएका छन् । आवेदन दिएका सबैको शेयर यस वर्षभित्रै निष्काशन हुनेछ ।
बुटवल पावर कम्पनी लिमिटेडले प्रिमियम मूल्यमा एफपिओ निष्काशन गर्न लागेको छ । सो कम्पनीले प्रतिकित्ता ५१८ रुपैयाँ प्रिमियम मूल्य प्रस्ताव गरेको छ । धितोपत्र बोर्डले स्वीकृति दिन बाँकी रहेको उक्त प्रस्तावअनुसार ४० लाख ८१ हजार कित्ता एफपिओ निष्काशन गर्न लागेको छ ।
पञ्चकन्या माई हाइड्रोपावर लिमिटेडले आयोजना प्रभावितलाई ११ करोड रुपैयाँ बराबरको ११ लाख कित्ता शेयर निष्काशन गर्ने तयारी गरेको छ । राधी विद्युत् कम्पनी लिमिटेडले सर्वसाधारणलाई सात करोड ६४ लाख ५५ हजार रुपैयाँ बराबरको सात लाख ६४ हजार कित्ता साधारण शेयर निष्काशन गर्ने तयारी गरेको छ ।
आँखुखोला जलविद्युत् कम्पनी लिमिटेडले स्थानीयवासीलाई आठ करोड रुपैयाँ बराबरको आठ लाख कित्ता शेयर निष्काशन गर्न लागेको जनाएको छ । आयोजनाका प्रमुख विश्वनाथ कँडेलले साधारण शेयर निष्काशनको तयारी अन्तिम चरणमा पुगेको जानकारी दिए ।
यस्तै गज्र्याङ उपत्यका हाइड्रोपावर लिमिटेडले स्थानीयवासीलाई दुई करोड रुपैयाँ बराबरको दुई लाख कित्ता साधारण शेयर निष्काशन गर्न बोर्डमा निवेदन दिएको छ । जोशी हाइड्रोपावर कम्पनी लिमिटेडले स्थानीयवासीलाई तीन करोड ७१ लाख ४० हजार रुपैयाँ बराबरको तीन लाख ७१ हजार ४०० कित्ता र शुभम् पावर लिमिटेडले स्थानीयवासीलाई दुई करोड रुपैयाँ बराबरको दुई लाख तथा लुघिम बुद्धपावर नेपाल लिमिटेडले स्थानीयवासीलाई नौ करोड ७८ लाख रुपैयाँ बराबरको नौ लाख ७८ हजार कित्ता साधारण शेयर निष्काशन गर्न लागेको छ ।
बोर्डका अनुसार युनिक हाइडेल लिमिटेडले पाँच करोड ५५ लाख रुपैयाँ बराबरको ५५ लाख कित्ता, सिइडिबी हाइड्रो फण्डले २२ करोड ८९ लाख ३० हजार रुपैयाँ बराबरको २२ लाख ९८ हजार कित्ता, कालिका पावर लिमिटेडले स्थानीयवासीलाई छ करोड रुपैयाँ बराबरको छ लाख कित्ता र युनियन हाइड्रोपावर लिमिटेडले छ करोड ३३ लाख ७४ हजार रुपैयाँ बराबरको छ लाख ३३ हजार कित्ता साधारण शेयर निष्काशनका लागि बोर्डमा निवेदन दिएको छ । रासस
प्रकाशित मितिः २०७४ भदौ २३
वि.सं.२०७४ भदौ २३ शुक्रवार ११:३६ मा प्रकाशित
