काठमाण्डौं । हिमालयन हाइड्रोपावरले प्रभावित क्षेत्रका स्थानीयको लागि १० लाख ६५ हजार ४ सय १७ कित्ता अर्थात् १० करोड रुपैयाँ बराबरको सेयर जारी गर्न लागेको छ । कम्पनीले माघ १७ गतेदेखि चाँडोमा फागुन २ गते र ढिलोमा फागुन १७ गतेसम्म सेयर बिक्री खुला गर्ने भएको छ ।
लमजुङ जिल्लाको चिती ढोडेनी, बन्सर, नौथर, श्रीमञ्ज्याङ, अर्चलबोट गाविसका बासिन्दाको लागि निष्कासित सेयर मध्ये ५ लाख ३२ हजार ७ सय ८ कित्ता छुट्याइएको छ ।
त्यस्तै, जिल्लाका अन्य बाँकी सबै क्षेत्रका बासिन्दालाई ५ लाख ३२ हजार ७ सय ९ कित्ता छुट्याइएको छ । कम्पनीको कार्यालय, ग्लोबल आइएमइ बैंक लिमिटेडको बेसीसहर शाखा, प्यासिफिक डेभलपमेन्ट बैंकको भोटेबडार शाखा र कैलाश बिकास बैंकको बेसीशहर शाखाबाट सेयर फारम पाइने छ ।
दोस्रो चरणमा भने कम्पनीले सर्वसाधारण र कर्मचारीको लागि २१ करोड ३० लाख रुपैयाँ बराबरको सेयर जारी गर्ने छ । कम्पनीको चुक्ता पुँजी १ अर्ब ६ करोड रुपैयाँ पुग्नेछ ।
लमजुङमा २७ मेगावाट क्षमताको दोर्दी हाइड्रोपावर निर्माण गर्ने तयारीमा रहेको हिमाल पावरले सेयर निष्कासनबाट संकलित रकम यसमा लगानी गर्ने उदेश्य लिएको छ । कुल ४ अर्ब २३ करोड लागत रहने यो आयोजना ७५ प्रतिशत कर्जा लगानी र २५ प्रतिशत सेयर पुँजीबाट निर्माण गरिने भएको हो । यो आयोजनाको अनुमती २१०३ साउनसम्म रहने छ । आयोजना निर्माण २०७१ पुसदेखि २०७५ जेठ मसान्तसम्म रहेको छ ।
७ माघ २०७३, ११।००
वि.सं.२०७३ माघ ७ शुक्रवार ११:०८ मा प्रकाशित
