काठमाडौ । शुक्रबार र शनिबार रुकुम र रोल्पामा उम्मेदवारमाथि बम आक्रमण भएपछि निर्वाचन सुरक्षामा गम्भीर चुनौति थपिएको छ । शुक्रबार रुकुममा वहालवाला मन्त्री चढेको गाडी लक्षित गरी बम बिस्फोट गरिएको थियो भने शनिबार रोल्पामा पूर्व अर्थमन्त्री चढेको गाडीमा एम्बुस थापिएको थियो ।
यी दुई घटनापछि शनिबार गृह मन्त्रालयमा आकस्मिक बैठक बसेर सबै उम्मेदवारको सुरक्षामा सुरक्षाकर्मी परिचालनमा कुनै त्रुटि नराख्ने विषयमा छलफल भएको छ । गृहसचिव मोहनकृष्ण सापकोटाको नेतृत्वमा मन्त्रालयमा बसेको बैठकमा उम्मेदवारको सुरक्षामा कमजोरी हुन नदिन तीनवटै सुरक्षा निकायका प्रमुखलाई सापकोटाले निर्देशनसमेत दिंदै उम्मेदवारको सुरक्षार्थ प्रहरीले जवाफी फायरिङ गर्नसक्ने जानकारी दिए ।
यी दुई बिस्फोटमा नेत्रविक्रम चन्द ‘विप्लवका कार्यकर्ता संलग्न भएको सूचना प्रहरीले पाएको छ । शुक्रबार रुकुममा माओवादी केन्द्रकै उम्मेदवार एवं पूर्वगृहमन्त्री जनार्दन शर्मालाई लक्ष्य गरेर बम विस्फोट गराइएको थियो ।शनिबार पूर्व अर्थमन्त्री वर्षमान पुनमाथि बम हानिएको थियो ।
त्यस क्रममा विप्लवका कार्यकर्ताले प्रतिशोधमा र चुनाव भाँड्ने योजनाअनुरूप विस्फोट गराएकाबारे सुरक्षा निकायका प्रमुखले सचिव सापकोटालाई ब्रिफिङ गरेका थिए । सचिव सापकोटाले चुनाव भाँड्ने तत्वमाथि विशेष निगरानी राखेर तत्काल पक्राउ गरी चुनाव अवधिभर थुनामा राख्न प्रहरी महानिरीक्षक प्रकाश अर्याललाई निर्देशन दिएका छन् ।
वाम गठबन्धनका उम्मेदवारमाथि मात्रै नभएर चुनाव नजिकिँदै जाँदा कांग्रेसलगायत मधेसी गठबन्धनका उम्मेदवारमाथि आक्रमण प्रयास हुन सक्ने भन्दै सचिव सापकोटाले सुरक्षा निकायलाई ‘हाईअलर्ट हुनुपर्ने निर्देशन पनि दिएका छन् ।
प्रकाशित मितिः२०७४ कार्तिक २६
वि.सं.२०७४ कात्तिक २६ आइतवार १४:४९ मा प्रकाशित
