काठमाण्डौ । ‘संसारभरि नै पेट्रोलियम पदार्थको खपत कम गर्ने र विद्युतीय ऊर्जा प्रयोग गर्ने लहर चलिरहेको बेला नेपालको गोल्छा समूहले विद्युतीय कार ल्याएकोछ । मात्र १२ लाख पर्ने यो कारको उत्पादन चीनमा भएको हो भने अहिले बिराटनगरमा चलिरहेको बिराट एक्पोमा यो कार राखिएकोछ ।
विद्युतीय कारलाई पूरा चार्ज गर्न ८ घण्टा लाग्छ । पूरा चार्ज गरेपछि पीचमा १ सय ६० किलोमिटर कुदाउन सकिन्छ । पहाडी बाटोमा भने केही कम दूरी तय हुन्छ । खुल्ला राजमार्गमा कारलाई ६० देखि ६५ को स्पिडमा कुदाउन सकिन्छ ।
कारमा एअर कन्डिसनर, पावर स्टेयरिङ, पावर विन्डोका साथ सेन्ट्रल लकजस्ता सुविधा रहेको र क्यामेराको प्रयोगले ब्याक गर्न सकिने छ । राम्रोसँग प्रयोग गरेमा ब्याट्री ३ वर्ष टिक्ने पनि कम्पनीले जनाएकोछ । त्यस्तै, ब्याट्रीमा पानी पनि हाल्नु पर्दैन । मेलामा राखिएका ४ वटा कार मध्ये एउटा कार बिक्री भइसकेकोछ । साढे १३ लाख मूल्य राखिएको कारलाई मेलामा १२ लाखमै विक्री गरिँदैछ ।
१६ फागुन २०७३, ११।००
वि.सं.२०७३ फागुन १६ सोमवार १२:१६ मा प्रकाशित
