काठमाडौ । नेपाल हाइड्रो डेभलपरको आइपीओ गोलाप्रथाबाट बाँडफाँट भएको छ । कुल ३६ हजार २७० जना आवेदकले १० कित्ता सेयर हात पारेका छन् । आइपीओमा १ लाख ७१ हजार ५९२ जनाको आवेदन स्वीकृत भएको छ भने १ हजार ९०९ जनाको आवेदन रद्द भएको छ ।
कम्पनीले साउन २७ गतेदेखि ३२ गतेसम्म कुल ३ लाख ९० हजार कित्ता आइपीओ निष्काशन गरेको थियो । यसमध्ये ७ हजार ८०० कित्ता कर्मचारी र १९ हजार ५०० कित्ता सेयर म्युचुअल फन्डहरुलाई छुट्याएर बाँकी रहेको ३ लाख ६२ हजार ७०० कित्ता सेयर सर्वसाधारणलाई बिक्री गरिएको हो । यो आइपीओमा १ अर्ब ५० करोड रुपैयाँको आवेदन परेको थियो ।
धितोपत्र बोर्डको नयाँ नियम अनुसार सबै आवेदकलाई न्यूनतम १० कित्ता सेयर बाँडफाँट गर्नुपर्ने हुन्छ । आवेदक धेरै भएर सबैलाई १० कित्ता बाँडफाँट गर्न नपुग्ने अवस्थामा मात्र गोलाप्रथाबाट सेयर बाँडफाँट गर्न सकिने अवस्था भएकाले यो आईपीओमा पनि आवेदकको संख्या धेरै भएपछि गोलाप्रथाबाट बाँडफाँट गरिएको हो ।
प्रकाशित मितिः २०७४ भदौ ३०
वि.सं.२०७४ भदौ ३० शुक्रवार १२:३५ मा प्रकाशित