काठमाडौ । नेपाल विद्युत प्राधिकरणले २ हजार मेगावाटभन्दा बढी बिजुली उत्पादन गर्न आयोजनापिच्छे कम्पनी गठन गरेको छ । ऊर्जा संकट निवारण तथा विद्युत विकास दशकमा घोषणा गरिएजस्तै नदी प्रवाही (आरओआर) र जलाशय आयोजना निर्माण गर्न कम्पनी खोलिएको हो ।
इन्जिनियरिङ परामर्श र विद्युत व्यापारसहित जलविद्युत आयोजना निर्माण गर्न १० कम्पनी दर्ता भएको प्राधिकरण कार्यकारी निर्देशकको सचिवालयले जानकारी दिएको छ । प्राधिकरणका अनुसार माथिल्लो अरुण हाइड्रो इलेक्ट्रिक, रहुगंगा हाइड्रो इलेक्ट्रिक, तामाकोसी पाँचौं जलविद्युत कम्पनी, उत्तरगंगा जलविद्युतलगायत कम्पनी गठन भएका छन् ।
उक्त कम्पनीले क्रमशः ३ सय ३५ मेगावाटको माथिल्लो अरुण, ४० मेगावाटको राहुघाट, ८७ मेगावाटको तामाकोसी पाँचौं, ३ सय मेगावाटको उत्तरगंगा जलाशय आयोजना निर्माण गर्नेछन् । यस्तै, दूधकोसी जलविद्युत कम्पनी, आँधीखोला जलविद्युत कम्पनी, तमोर जलविद्युत कम्पनी र मोदी खोलामा निर्माण हुने २ आयोजना निर्माण गर्न मोदी जलविद्युत कम्पनी खडा गरिएको छ ।
ती कम्पनीले ३ सय मेगावाटको दूधकोसी, १ सय ८० मेगावाटको आँधीखोला, ६ सय ६५ मेगावाटको तमोर निर्माण गर्ने प्राधिकरणले जनाएको छ । कम्पनी दर्ता भएकाले अब त्यहाँ कार्यकारी प्रमुखसहित पदाधिकार नियुक्त गर्ने प्रक्रिया सुरु गरिएको कार्यकारी निर्देशकको सचिवालयले जनाएको छ । तमोरको क्षमता बढी भए पनि प्राधिकरणलाई २ सय मेगावाटको मात्र अनुमति दिइएको छ ।
प्रकाशित मितिः २०७३ चैत २३
वि.सं.२०७३ चैत २३ बुधवार १४:०४ मा प्रकाशित
