काठमाण्डौँ । अरुण कावेली पावर लिमिटेडले ३० करोड रुपैयाँ बराबरको ३० लाख कित्ता सेयर सर्वसाधारणका लागि बिक्री गर्ने भएको छ। ७ कात्तिकमा निस्कासन हुने सेयर छिटोमा १२ गते नभए २३ गते बिक्री बन्द हुने निष्कासन तथा बिक्री प्रबन्ध कम्पनी सिद्धार्थ क्यापिटलले जनाएको हो।
कम्पनीले पाँचथर र ताप्लेजुङ जिल्लाको सिमा भएर बग्ने कावेली नदीमा २५ मेगावाटको कावेली बी–१ परियोजना निर्माण गरि रहेको छ। प्रतिमेगावाट १६ करोड रुपैयाँका दरले चार अर्ब रुपैयाँमा निर्माण पुरा गर्ने कम्पनीले जनाएको छ। कुल निस्कासन मध्ये तीन प्रतिशत कर्मचारीका लागि र पाँच प्रतिशत म्युचियल फण्डहरुका लागि आरक्षित गरिएको छ। कर्मचारीले ९० हजार र म्युचुअल फण्डहरुले एक लाख ५० हजार कित्ता सेयर पाउन लागेका हुन्।
आइपिओ बाँडफाँड पश्चात एक एक अर्ब ५० करोड रुपैयाँ चुक्ता पुँजी पुग्ने कम्पनीमा संस्थापक समुहको ७०, आयोजना प्रभावित बासिन्दाको १० प्रतिशत र सर्वसाधारणको २० प्रतिशत सेयर हुनेछ। प्रबर्धक मध्ये अरुणभ्याली हाइड्रोपावर डेभलपमेन्ट कम्पनीले सर्वाधिक ३६ लाख कित्ता सेयर लगानी गरेको छ।
कम्पनीको सेयर भर्नका लागि सिद्धार्थ क्यापिटलको कार्यालय, थापाथलीको ट्रेड टावर स्थित अरुण कावेलीको कार्यालय र सिद्धार्थ बैंकका सबै शाखाबाट आवेदन गर्न सकिनेछ।
२१ असोज २०७३, ११।००
वि.सं.२०७३ असोज २१ शुक्रवार १३:१४ मा प्रकाशित