काठमाण्डौं । सरकारले निजामति कर्मचारीहरुको लगानीमा कर्णाली–७ जलविद्युत आयोजना निर्माण गर्ने भएको छ । यसमा प्रारम्भिक सहमति जुटेपछि थप गृहकार्य गर्ने जिम्मा ऊर्जा सचिवलाई दिइएको छ ।
निजामति कर्मचारीहरुको लगानीमा कर्णाली ७ बन्ने भएको हो । यसलाई विद्युत विकास विभाग आफैंले अध्ययन गर्दैछ । करिव २०० मेगावाटको यो आयोजनालाई माथिल्लो कर्णाली जलविद्युत आयोजनाबाट निस्कने पानीको वहावलाई रेगुलेटिङ गर्ने आयोजनाका रुपमा लिइएको छ ।
त्यस्तै, उर्जा मन्त्रालयले दक्षिण कोरियामा रहेका नेपालीहरुको लगानीमा जगदुल्ला जलविद्युत आयोजना निर्माणको योजना अघि सारेको छ । यही प्रस्ताव लिएर उर्जामन्त्री जनार्दन शर्मा आज शुक्रबार कोरिया प्रस्थान गरेका छन् ।
जाजरकोटमा रहेको जगदुल्ला खोलामा बन्ने यो आयोजना ७५ देखि १०० मेगावाट हुने अनुमान छ । आयोजनाको वातावरणीयसहित अध्ययन विद्युत विकास विभाग आफैंले गर्नेछ । विभागका अनुसार अर्को वर्ष अध्ययन थल्ने र लगानी जुटाएर २ वर्षभित्र निर्माण थाल्ने लक्ष्य छ ।
हाल ईपीएस अन्तरगत झण्डै ३५ हजार नेपाली दक्षिण कोरिया पुगेका छन् र, उनीहरुको मासिक औषत आम्दानी मासिक डेढ लाख रुपैयाँ माथि छ । दक्षिण कोरियाबाट बाषिर्क ४३ अर्ब रेमिट्यान्स भित्रिन्छ ।
४ चैत २०७३, १।००
वि.सं.२०७३ चैत ४ शुक्रवार १३:३० मा प्रकाशित