आइसीसी च्याम्पियन्स ट्रफी अन्तर्गत बिहिबारको खेलमा श्रीलंकाले साबिकको बिजेता भारतमाथि शानदार जित हात पारेको छ । प्रतियोगिता इतिहासकै सबैभन्दा ठूलो लक्ष्य पछ्याउँदै भारतमाथि ७ विकेटको जित रचेको हो ।
३ सय २२ रनको लक्ष्य पछ्याएको श्रीलंकाले ८ बल बाँकी छँदै लक्ष्य पुरा गरेको थियो। दोश्रो विकेटका लागि दनुस्का गुनथिलका र कुसल मेन्डिसले १ सय ५९ रनको साझेदारी गरेपछि श्रीलंका जिततर्फ अग्रसर भएको थियो। रनआउट हुनुअघि दुवै ब्याट्सम्यानले अर्धशतक पुरा गरेका थिए।
गुनथिलकाले ७२ बलमा ७६ रन जोडे भने मेन्डिसले ९३ बलमा ८९ रन बनाएका थिए। कुशल परेरा ४४ बलमा ४७ रन जोड्दै रिटायर्ड हर्ट भएका थिए भने कप्तान एन्जेलो म्याथ्युज ५२ रनमा अविजित रहे। असेला गुणरत्नेले २ चौका र २ छक्काको मद्दतले २१ बलमा अविजित ३४ रनको महत्वपूर्ण पारी खेले। भारतका लागि भुवनेश्वर कुमारले १ विकेट लिएका थिए।
पहिलो ब्याटिङ गरेको भारतले ओपनर शिखर धवनको शतकको मद्दतले ३ सय २१ रनको विशाल योगफल तयार पारेको थियो। धवनले ७८ रन बनाएका रोहित शर्मासँग मिलेर १३८ रनको साझेदारी गरेका थिए। विराट कोहली शून्यमा पेभेलियन फर्कँदा युवराज सिंहले ७ रनमात्र जोड्न सके। महेन्द्र सिंह धोनीले ५२ बलमा ६३ रनको आक्रमक पारी खेलेका थिए।
मालिङ्गाको बलमा क्याच आउट हुनुअघि धवनले १ सय २८ बलमा १ सय २५ रन जोडे। उनले १५ चौका र १ छक्का प्रहार गरेका थिए। प्रतियोगितामा भारतको पहिलो हार हो भने श्रीलंकाले पहिलो जित हो ।
प्रकाशित मितिः २०७४ जेठ २६
वि.सं.२०७४ जेठ २६ शुक्रवार १३:१७ मा प्रकाशित
