काठमाडौ। नेपाल घरेलु तथा साना उद्योग महासंंघको आयोजनामा आगामी वैशाख ७ देखि ११ गतेसम्म अन्तर्राष्ट्रिय औद्योगिक व्यापार मेला तथा प्रविधि प्रदर्शनी हुने भएको छ । महासङ्घले आज पत्रकार सम्मेलन गरी नेपालका थुप्रै युवा वैज्ञानिक र अनुसन्धानकर्ताले गरेको अनुसन्धानलाई प्रोत्साहन गर्नेगरी काठमाडौको भृकुटीमण्डपमा मेला आयोजना गरिने जनाएको छ ।
महासङ्घका अध्यक्ष श्यामप्रसाद गिरीले देशको अर्थतन्त्रलाई अगाडि लैजान साथै नयाँ प्रविधिको विकास गर्न प्रविधि प्रदर्शनी गर्न लागिएको जानकारी दिए । उनले भने, “मेलाले वर्तमान मुलुकको औद्योगिक अवस्था कस्तो छ भन्नेबारे जानकारी दिन मद्दत पुग्नेछ ।”
महासङ्घले पहिलादेखि नै राष्ट्रिय औद्योगिक प्रदर्शनी गर्दै आए तापनि पहिलोपटक अन्तर्राष्ट्रियस्तरको प्रदर्शन गर्न लागेको पत्रकार सम्मेलनमार्फत जानकारी दिईयो ।
प्रदर्शनीमा चीन, भारत, बङ्गलादेश, पाकिस्तान लगायतका मुलुकमा विकास गरिएका प्रविधिलाई समावेश गराइनेछ । यसबाट नेपालका अनुसन्धानकर्ताहरूलाई थप ज्ञान र सीप प्राप्त हुनेछ भन्ने अपेक्षा गरिएको छ ।
प्रदर्शनीमा ७५ जिल्लाबाटै उद्यमीहरू एवं उपयुक्त प्रविधि प्रयोगकर्ता उद्यमीहरू, प्रविधि अन्वेषणकर्ताहरूको सहभागिता रहने प्रदर्शनीमा ३०० वटा स्टल रहनेछन् भने एक लाख भन्दा बढी अवलोकनकर्ताहरूले अवलोकन गर्ने महासंघको अपेक्षा रहेको छ ।
प्रकाशित मितिः २०७३ पुस १३
वि.सं.२०७३ पुस १३ बुधवार १९:३४ मा प्रकाशित