काठमाडौ । युनाइटेड मोदी हाइड्रापावरको आइपीओमा चार अर्ब रुपैयाँको आवेदन परेको छ । यो परम्परागत तरिकाबाट संकलन केन्द्रमा गएर आवेदन दिनेको मात्र विवरण हो । आस्वाबाट आवेदन दिनेको विवरण यसमा समावेश गरिएको छैन । आस्वाको विवरण आउन अझै केही दिन लाग्ने बिक्री प्रबन्धकले जानकारी दिएको छ ।
युनाइटेड मोदीको आइपीओ सोमबारदेखि बिक्री बन्द भइसकेको छ । तीन दिनमा दुई अर्बको आवेदन परेको थियो । अन्तिम दिन सोमबार थप दुई अर्ब रुपैयाँको आवेदन परेको हो । बिक्री प्रबन्धक एनआइबीएल क्यापिटल लिमिटेडका मर्चेन्ट बैंकिङ प्रमुख बद्री प्याकुरेलले आस्वाबाहेक संकलन केन्द्रबाट मात्रै चार अर्ब रुपैयाँको आवेदन परेको जानकारी दिए । ‘आस्वाको विवरण आउन अझै केही दिन लाग्छ,’ उनले भने । कुल ६४ हजार पाँच सय जनाले संकलन केन्द्रमा गएर सेयर भरेका छन् । आस्वाको विवरण आएपछि आवेदन रकम अझै निकै बढ्ने अनुमान गरिएको छ । यसअघिको ट्रेन्ड हेर्दा कुल आवेदन परेको रकममध्ये २५ प्रतिशत हाराहारीमा आस्वाबाट हुने गरेको थियो ।
युनाइटेड मोदीले फागुन १९ गतेदेखि १७ लाख २५ हजार कित्ता आइपीओ बिक्री खुला गरेको हो। एक सय रुपैयाँ अंकित मूल्यको यो आइपीओमा न्यूनतम ५० देखि अधिकतम १५ हजार कित्तासम्म आवेदन दिन पाइने व्यवस्था गरिएको थियो । कम्पनीले ३४ हजार ५०० कित्ता सेयर कर्मचारीको लागि छुट्याएको छ भने ८६ हजार २५० कित्ता सेयर सामूहिक लगानी कोष कम्पनीहरुलाई दिएको छ ।
प्रकाशित मितिः २०७३ फागुन २५
वि.सं.२०७३ फागुन २५ बुधवार ११:५४ मा प्रकाशित